Emîne Şenyaşara ke mêrde û di lajê ci hetê merdim û pawitoxanê Wekîlê AKPyî Halîl Îbrahîm Yildizî ra kişîyayî lajê xo Ferît Şenyaşarî reyde verê Edlîyeya Riha de nobeta edaletî gêna. Nobeta edaletî ya keyeyê Şenyaşarî roja 44. de dewam kena. Keyeyê Şenyaşarî ewro Fadil Şenyaşaro ke Zîndanê Xarpêtî de tepişîyeno, reyde pê telefonî qisey kerd coka erey ame verê edlîye.

Keyeyê Şenyaşarî hesabê xo yê medyaya dîjîtale ra seba zîyaretê înan Platformê Cinîyan ê Şahmarane yê Mêrdînî rê sipas kerd û vat: Vera zulmî bêveng û bêterefmendiş yeno manaya paştdayîşê zulmî. Bêrê ma pîya vera zulm û bêedaletî bibê yew veng.''