Temsîlkarê KNKyî yê Başûrê Kurdîstanî Denîz Cevdet Bulbun 18ê êlule de hêrişê vera bînaya KNKyî de amebi qetilkerdene. Keyeyê Denîz Bulbunî bînaya KNKyî ya Hewlêrî de eşkerayîye daye çapemenîye.

Babî Cevdet Bulbunî vat: ''24 rojî yo lajê mi kişîyayo. Heta nika çew nêame destbendkerdene û hêzanê asayîşî agahîyêke nêdaye ma. Ma wazenê ke wa kiştoxî bêrê eşkerakerdene. Lajê mi mamostayê ziwanê kurdkî bi. O kesêko bêsûc bi. Çend rojî yo ma Hewlêr de yê. Asayîşê Hewlêrî wa cade kiştoxanê lajê mi bivîno.

Ez venga hukmatê Başûrê Kurdîstanî û hêzanê sîyasîyan ê Başûrî dana ke wa cade kiştoxan bivînê û cezayanê înan bidê. Wa sebebê qetilkerdişê lajê mi zî bêro eşkerakerdene.''