Dima ke dewa Sîsê ya qezaya Licê ya Amedî de reya hîrêyîn vera goran hêriş amebi kerdene keyeyî seba gerreyê hêrişkeran têgêrayî. Nê goran ra yew zî gorê Osman Altindagî (Kendal Amed) o ke 11ê adara 1999î de Sason de şehîd bi. Waka Osman Altindagî Hanime Altindag pare kerd ke a do gerreyê hêrişkeran bikera.

Hanime Altindag hêrişê vera goran sey ''wahşet'' pênase kerd. Altindage ard ziwan ke ganî vera goran hûrmet bêro mojnayene û vat: ''Nê hêrişî tesîrê keyeyan kenê. Seke domanê ma reyna kişîyenê. Dadîyî pê nê goran tesel benê. Dadîya mi nêweş a û rewî ra gorê birayê mi nêdî. Ez nêeşkîya ci rê qala hêrişî bikera. Ez û birayê mi ma sey embazî bîyî. Ma yewbînan rê her çî vatêne. Hînî mi kerraya ci rê vatêne. No zî gina înan ro. Ez reya verêne emser roşan de nêeşkîyay şora serê gorê ci. '' 

Altindage vist vîrî ke Tirkîya de esteyê zî goran ra yenê vetene û îfade kerd ke polîtîkaya şerê taybetî yena caardene. Altindage vat: ''Cenazayî seba ma erj ê. Ma do pê rayîrê Komeleya Huqûqnasan a Seba Azadîye gerreyê hêrişkeran bikerê. Destê ma ra çi yeno ma do bikerê. Keyeyî zî wa wayîrê goranê xo bivejîyê, vera nê wahşetî bêveng nêmanê.''