3ê tebaxa 2014î de kurdê êzidîyî reyna rastê fermanêkî ameyî. Êzidîyî 3ê tebaxa 2014î de bîyî hedefê hêrişanê çinkerdişî, kolekerdiş û esîrkerdişî yê cerganê barbaran ê DAÎŞî.

Tay kesî şahîdê nê qirkerdişî bîyî. Nê şahîdan ra rojnameger Hayrî Kizilerî qala serebûtanê ê çaxî ANFyî rê kerde.

Qiseykerdişê Kizilerî ra beşêk wina yo:

''Mudaxeleyê Mûsilî ra dima 2003 de hêzê Iraqî ameybî herême. Fermanê 72. de êzidîyan modelêkê xopawitişî awan kerdbi. No pawitiş zî koyî bîyî. Koyan ê pawitêne. La Saddamî êzidîyî surgunê çolan kerdî û ê zî bê pawitiş mendî. Sebebê pîlbîyayîşê fermanê 71. zî modelê îdareyê PDKyî bi. PDKyî wina yew stratejî kerdêne ke komel bêpawitiş mend.

Dima ke 9ê hezîrana 2014î de Mûsil kewt merdiman selahîyetdaranê PDKyî rê rewşa xo persaye. PDKyî zî vatêne ê do êzidîyan bipawê, ê amade yê. Mi zanayêne ke ê do nêpawê. Îşxalê Mûsilî ra dma şarê Telaferî zî verê xo da Şingal. Ê exlebî tirkmenê sûnîyî bîyî û dima zî şîyî Kerbela û Necef.

Îşxalê Telaferî ra dima Şingal têna ame verdayene. Dormeyê ci ame girewtene. Heta roja peyêne PDKyî şarê Şingalî rê vatêne 'Vinderê, sebir bikerê ma do şima bipawê. La roja peyêne hêzê PDKyî herême ra vejîyayî û remayî. Şar şoq bibi.Nêzanayêne ke xo senî bipawê. La tay cayan de reyna zî xo pawit. Mîsal xoverdayîşê Gir Zerik û Sîba Şêx Xidir. Labelê cebilxane qedîya û xoverdayîşê înan şikîya.

Îşxalê Mûsişî ra dima şarê Şingalî çekê ke hêzanê Iraqî ra mendî girewtî la PDKyî dest na nê çekan ser. Çira çîyo winasên kerd ma hema zî fam nêkenê.

DAÎŞî şewa 2ê tebaxe de hêrişê Sîba Şêx Xidir, Gir Zerik û Til Qesabê kerd û serê sibayî zî hêrişê Şingalî kerd Sinûn de şer qewimîyayêne. Yewinêka YPGyî xo resna uja. Seba ke merdimî derbaz bibê yewine rayîr akerd.

Di rayîrî resayêne Şingal. Înan ra yew merkezê Şingalî ra bi, o bîn zî hetê Sinûnî de bi. Eke nê di rayîrî bigêrîyayêne binê kontrolî verê DAÎŞî zî ameyêne girewtene. 12 gerîlayanê HPGyî zî waşt ke wina bikerê. Ma venê 12 la înan ra 3 gerîlayî hetê PDKyî ra ameyî tepiştene. Ê zî mengêke verê cû bi hawayêkê qeçaxî ameybî Şingal. Nê 9 gerîlayan ra di kesî zî xeta Sinûnî de bîyî ke YPG resabi uja. 7 gerîlayanê bînan 200 hezar merdimî resnayî koyan û qirkerdişêkê pîlî ra xelisnayî. La tebaxe bîye, hewa germ bi. Xeylêk kokim û domanî germî ra merdî.

O çax hetê Solaxê de mi xo verda mabênê newalêkî. Bi seyan cenazayî estbî. Merdimî germî ra merdbî. Dewa Gabarî de zî qirkerdişêko pîl amebi kerdene. Her ca de cenazayî estbî.

Domanêkê qijkekî zî zanayêne ke ganî Şingal pê kamyew stratejî bêro pawitene. Eke koyanê Şingalî ser o çekê giranî biameyêne cakerdene no qirkerdiş nêameyêne kerdene. No çi kêmasîyêka leşkerî nîya. Na birêka sîyasî ya. 

Ame waştene ke êzidîyî bêrê qirkerdene. PKKyî no çerx tarûmar kerd. Seba ke nêeşkê êzidîyan qir bikerê nika zî hêrişê ci kenê. 

Ganî nê her hela ê qirkerdişî biameyêne qeydkerdene. Çunke her hela vînbîyaye yena manaya kêmîyayîşê dokumentêkê tarîxîyî.''