Koordînayonê KJK'yî derheqê serewedartişê şarê Şêladizê yê vera  îşxalî û bombardûmanê dewleta Tirkî yê serê Başûrê Kurdistanî eşkerayîyêka nuştekîye daye.

Artêşa Tirkî ya îşxalkare 23ê Çile de roja Çarşemeyî  Başûrê Kurdistanî de 4 sivîlî qetil kerdî.  Naye ser a roja Şemeyî şarê Şêladizê vera îşxalkaranê Tirkî serewedart û dest  na baregehê leşkerî yê Sirê yê artêşa Tirkî ser a. Xeylî wesayîtê leşkerî ameyî tafînayene. Artêşa Tirkî tîya reyna hêrişê şarî kerd û 2 sivîlê bînî qetil kerdî.

MA ŞARÊ XO YÊ XOVERDAYOXÎ PÎROZ KENÎ

KJKyî  merdimanê şehîdanê ke hetê dewleta Tirkî ra ameyî qetilkerdene rê serweşîye waşte, şaro ke tewrê nê serhildanî biyo  silam kerd û va:‘‘  Sere de Şêladizê, Dêralok, Duhok û heme Başûrê Kurdistanî de tewirê şarê yê vera îşxalkaran zaf bimana û bierj o.Şarê ma yo ke hewtî ra heta hewtayî  cinî, camêrd û ciwanî vera îşxalkaran sere wedarto û baregehê artêşa Tirkî fînayî dest û dayo vêşnayene, ma înan pîroz kenî.

NO SEBA TARÎXÊ BAŞÛRÊ KURDISTANÎ ZAF MUHÎM O

No demo ke çar parçeyê Kurdistan û teberê welatî de rayberîya cinîyan de vera faşîzmê dewleta Tirkî xoverdayîşêko biheybet yeno dayene de, serewedartişê Şêladizê seba  rûhê  welatperwerîye û yewîya neteweyîye yê şarê Başûrê Kurdistanî tewirê xoverdayîşê yo zaf muhîm vejeno werte. No tewir  hem îşxalkaranê Tirkî rê hem zî hukmatê Başûrî yo ke îşxalê herra ma rê bêvêng maneno rê cewab o. Şarê Başûrî ramot ke ê erdê xo de îşxalkaran nêwazenê.

Senî ke yeno zanayene tarîxê dewleta Tirkî tarîxê qirkerdişê Kurdan o.  Qet ferqê dewleta Tirkî û rejîmê Saddamî çîn o.  Dewleta Tirkî tena Vakur de nê çar parçeyê Kurdistanî de qirkerdişê Kurdan hedef kena. Senî ke Cizîr, Sûr, Sîlopî, Roboskî, Rojawan û Efrîn de şarê Kurdî qetil kerd Başûr de zî bi waştişê qirkerdişî hêriş kena.

Ganî heme partîyê sîyasîyî yê ke Başûr de yê mesajê şarê Şêladizê û Dêralokî hole fahm bikerê. No serewedartiş heman wexte de ramot ke heme partîyê sîyasîyî yê Başûrî ganî polîtîkaya xo reyna çîman ra ravêrnê. Wa no zaf hole bêro fahmkerdene ke ê ke polîtîkaya hêrişkare ya dewleta Tirkî nêvînenî û vera ci tewir nêgênî, ê vera mucadeleyê azadîye yê şarê ma de yê. Nê bingeyî de ma reyna serhildanê şarê Başûrê Kurdistanî pîroz kenî‘‘