Koordînasyonê KJKyî bi eşkerayîyêke vera CPTyî nêrazîbîyayîşê xo mojna ke zîyaretê xo yê Tirkîya de nêşîyo Îmraliyî. Eşkerayîye wina ya:

''Dezgehê mîyanneteweyîyî bîyî hacetê şerî yê îqtîdaran ke Komîteya Vergirewtişê Îşkenceyî (CPT), Neteweyê Yewbîyayeyî (NY), Mehkemeya Heqanê Merdiman a Ewropa (MHME) zî nînan ra yê. Heyetê CPTyî çend rojî verî ameyo Tirkîya la rixmê nêrazîbîyayîşê vera tecrîdî zî nêşîyo Îmraliyî. CPTyî çalakîya grevê vêşanîye yê zîndanan zî çin hesibnaye. Bi nê tewirî CPT tewirê xo yê exlaqî û xoserî ra dûrî kewt. Ma nê tewirê CPTyî şermezar kenê. Bi na wesîle ma venga pêro dezgehanê mîyanneteweyîyan da ke 'bi rolê xo yê esasî têbigêrê.'

Paradîgmaya neteweya demokratîke, ekolojîke û azadîgîra cinîyan a Rayber Apoyî pêro dinya û herême rê bîya îlham. Destepêkê Komployê 15ê Sibate ra nata şarê ma û cinîyî tim wayîrê Rayber Apoyî vejîyayî û hê vejîyenê. Nê xoverdayîşê ma û ê Rayberîye sîstemê kapîtalîzmî yo barbar qels kerd. Rayberê ma nê xoverdayîşê xo yê Îmraliyî de paradîgmaya xo sey alternatîfî pêşkêşê şarî kerde. Ma qetî sîstemê Îmraliyî nêşinasnenê û heta parçekerdişê nê sîstemî têkoşîn bikerê. Ma venga dezgehanê mîyanneteweyîyan zî danê ke seba ney erkê xo bîyarê ca.

Rejîmê AKP-MHPyî yo faşîst hêrişanê xo yê vera kurdan rê dewam keno. Embazê ma yê gerîlayî mîyanê xoverdayîşêkê heybetînî de yê û nêverdenê ke faşîzmê AKP-MHPyî ser bikewo. No xoverdayîş hêvîya ma zêdîneno, bingeyê têkoşînî aferneno û xurtêr keno. Xoverdayîşê embazanê ma yê zîndanan zî proses dîyar keno. Bi na wesîle ma grevê vêşanîye yê zîndanan o ke 84 rojî yo dewam keno, selam kenê. Ma venga şarê xo, dostanê xo û cinîyan danê ke dormeyê nê xoverdayîşî de têkoşînî pîlêr bikerê.''