Koordînasyonê KJKyî derheqê ambargoyê PDKyî yê vera Kampa Şehîd Rûstem Cûdîyî (Mexmûr) de eşkerayîyêka nuştekîye daye.

Eşkerayîya KJKyî wina ya:

''Temmuza 2019î ra nata bi bihaneya çalakîya ke Hewlêr de vera MÎTî amebî kerdene, vera Kampa Mexmûrî ambargo yeno caardene. Kampe ameye tecrîdkerdene. Şîyayîş û ameyîşê Hewlêrî qedexe yê. Na polîtîkaya PDKyî nêna qebulkerdene. Nê wextî de ke TC wazeno Heftanînî ra erdê kurdan îşxal bikero ganî mabênê kurdan de yewîye bêra caardene.Ambargoyê vera Mexmûrî sûcê merdimîye yo.

Menganê peyênan de rîyê vîrusê Korona ra zî şert û mercê kampe bîyî xirabêr. Kampe de nêweşxane, derman, xizmetê weşîye çin ê.

Ambargoyê vera Mexmûrî zêdêr tesîrê doman, cinî û kokiman keno. Rîyê nê ambargoyî ra xeylêk cinîyê diganî domananê xo ra bîyî. Nêweşê giranî nêameyî weşkerdene. Ciwanî nêeşkenê şorê dibistananê Hewlêrî.

Dewleta tirke 15ê hezîrane de hêrişê Mexmûr û Şingalî kerd. Vera nê hêrişan tewir û eşkerayîyê PDKyî qîm nêbîyî. Selahîyetdaranê PDKyî îfade kerd ke Başûr rîyê PKKyî ra beno hedef. PDK wina rayaumûmîya kurdan manîpule keno.

Nê hêrişî têna vera PKKyî nîyê. Dewleta tirke bi xeyalanê Osmanijan wazena pêro Kurdîstan û Sûrîye îşxal bikera. Eke îşxalê dewleta tirke Heftanîn de ser bikewo o çax dore yena Zaxo û Diholk zî. Ganî na rewşe hol bêra famkerdene. PDK bi bêvengî û hemkarîya xo şaşitîya tarîxî keno.

Ambargoyê vera Mexmûrî bi waştişê dewleta tirke yeno caardene. PDK bi nê hawayîn senî eşkeno vajo ê menfaatanê kurdan pawenê.

Eke PDK wazeno yewîya kurdan xurt bikero ganî ambargoyê vera Mexmûrî wedaro û vera îşxalê dewleta tirke serê Heftanînî tewirê xo bimojno.

Nê esasî ser o sere de cinîyan kurdan ê Mexmûrî rê ke vera polîtîkayanê şerê taybetî yê TCyî xo ver danê, rayberîye kenê ma selam kenê û hûrmetê xo pêşkêşê înan kenê.

Ma seba wedaritişê ambargoyî reyna venga PDKyî kenê. Ma venga partîyanê sîyasîyan ê Başûrî, Parlamentoya Kurdîstanî, cinîyanê kurdan danê ke seba wedaritişê ambargo û tecrîdê vera Mexmûrî xîret bikerê û têbigêrê.''