Koma Îtîfaqê Kurdîstanî derheqê qirkerdişê Konya de Cemîyetê Rojnamegeranê Guneydoguyî yê Amedî de kombîyayîşê çapemenîye kerd. Hemsereka DBPyî Salîha Aydenîz de tewra kombîyayîşî bîye û pare kerd ke mesuldarê nê qirkerdişî îqtîdarê AKP-MHPyî yo. 

Aydenîze vat: ''Wa îqtîdar hol bizano ke şarê kurdî têna nîyo. Ma do pê ruhê yewîye vera hêrişan vejîyê.''

Dima Vervatoxê Komeleya Kurdan a Demokratîke-Şorişgêre (DDKD) Abdulhey Okumuşî eşkerayîya hempare ya Koma Îtîfaqê Kurdîstanî wende.

Eşkerayîye de ame parekerdene ke kurdî şaristananê Tirkîya de tim maruzê hêrişan ê nîjadperestan manenê û netîceya hêrişê Meramî yê Konya de 7 kurdî bi hawayêkê barbarî ameyî qetilkerdene. Eşkerayîye de ame vîrvistene ke keyeyê Dedeogullariyî verî zî maruzê hêrişî mendbi û rixmê ney zî keye nêame pawitene.

Eşkerayîye de nê çîyî ameyî vatene: ''Kurdan rê yeno vatene ke Konyai Afyon, Manîsa, Anqara, Îstanbul ûsn de sey kurdan measê, kurdkî qisey mekerê, nasnameyê kurdayetîye xo vîr a bikerê. Ziwanê dewlete nê hêrişan zêdîneno, verê ci akeno. Îqtîdaro sîyasî nê serebûtan ra mesuldar o. Ganî verê nîjadperestî bêra girewtene û kiştoxî bêrê cezakerdene. Ma venga pêro hêzanê demokrasî yê Tirkîya, partîyanê muxalefetî, dezgehanê sivîlan danê ke vera hêrişanê nîjadperestan vinderê. Şarê ma yê kurdî qetî têna nîyo.''