Endamê Fermandarîya Akademîyanê Şehîd Mam Zekîyî Kendal Çîyayî bi wesîleya serrgêra Qirkerdişê Êzidîyan ê 3ê Tebaxa 2014î ANFyî rê qisey kerd.

Kendal Çîyayî dîyar kerd ke qasê 8 serran komelê êzidîyan zî tede şarê kurdî mîyanê prosesêkê giranî de bi û dewleta tirke hêrişê xo yê qirkerdişî de israr kerd. Çîyayî ard ziwan ke Kurdîstan de şer û xoverdayîşêko pîl est o û vat: ''Şarê kurdî hînî sey verî nîyo, şarê ma xo rêxistin kerdo. Şarê zaneno ke dewletê ke paştî danê dewleta tirke armancê înan çita yo û zaneno kamyew dewlete peyê qirkerdişî de ya.

Dewleta tirke tim paştî dayêne cerganê DAÎŞî û 2014 de wexto ke DAÎŞî Mûsil îşxal kerd zî wezîfedaranê Sersefîrîya Tirkîya ra çîyêk nêbi. Heta nika 3 payeberzê DAÎŞî ameyî kiştene û hîrêyêmînî nzî herêmanê binê kontrolê dewleta tirke de bîyî. No zî eşkera keno ke têkilîya înan senî xurt a. Dewletê bînî zî ney zanenê la pê bêvengîya xo na têkilîye tesdîq kenê.''

Çîyayî da zanayene ke PDKyî Şingal nêpawit û rema. Çîyayî vat: ''Fermanî ra dima hînî şarê ma hêzanê xo ra ber pê qet yew hêzî bawer nêkeno.PDKyî wextê Fermanî de fîşekêk zî nêteqna. Şarê ma xêrê tecrubeyanê xo û Têgêrayîşê Azadîye ra hêzê xo yê xopawitiş û rêxistinîye xurt kerdî. Na çarçewe de hêzanê YBŞ û YJŞyî awan kerdî û Îdareyo Xoser ê Şingalî îlan kerd. Hayîya şarê ma pê îtîfaqanê gemarinan est a. Coka şarê ma wayîrê hêzanê xo vejîyeno û paştî dano înan.

PDKyî dima ke fam kerd ke nêeşkeno rêxistinîya şarê ma parçe bikero Amerîka, Neteweyanê Yewbîyayeyan û Iraqî reyde  Peymana 9ê Teşrîna Verêne ya 2020î îmza kerde. Pê na peymane ame waştene ke şarê ma bêro tasfîykerdene. Coka serkêşê şarê ma ameyî hedefkerdene û embazê ma yê sey Mam Zekî, Saîd Hesen Saîd, Dijwar Feqîr, Heval Zerdeşt û Heval Azad ameyî qetilkerdene. Bi fermanê Kazimîyî artêşa Iraqî 17ê nîsane de hêrişê Şingalî kerd. Nê hêriş de zî ame waştene ke YBŞ-YJŞ, Asayîşê Êzidxanî û Îdareyo Xoser ê Şingalî bêrê tasfîyekerdene.''

Çîyayî îfade kerd ke ganî şarê Iraqî yewîya xo bîyaro ca û vat: ''Ganî şarê Iraqî serê paradîgmaya Rayber Apoyî de cuya demokratîke xo rê bikerê esas. Iraq de weçînayîş serrêke verî ame kerdene la hema zî hukmat nêame awankerdene. No çi verê krîzan akeno. Dewleta tirke hêzêko îşxalker o. Eke ma meseleyanê xo çareser nêkerê qirkerdişanê sey Skeniyê, Sinûnê û Zaxoyî do biqewimîyê. Dewleta tirke ya îşxalkere ganî Iraqî ra bêro vetene. Ma do hesabê pêro qirkerdişan bipersê. Ma senî ke DAÎŞî ra hesab persayî do xayînan û dewleta tirke ra zî bipersê. Ma no soz dayo şarê xo û şehîdanê xo.''