Komxebata 'Wext Wextê Pawitişê Ziwanî yo' ya ke hetê HDP û Komeleya Cigêrayîşê Kultur û Ziwanî ya Mezopotamya (MED DER) ra yena serûberkerdene dest pêkerde. Komxebate otêlêka Amedî de yena kerdene û 2 rojan do dewam bikera. Komxebate de do polîtîkayê asîmîlasyon, qedexe û teda bêrê nîqaşkerdene. 

Paltformê Ziwanê Kurdkî, Torra Ziwan û Kulturê Kurdan, Wekîla HDPyî ya Amedî Dêrsime Dag, îdarekarê Partîya Komunîste ya Kurdîstanî (KKP), aktîvîstê TJA tewrê komxebate bîyî. Hemsereka MED-DERî Şîlane Elmas Kan destpêkê komxebate de qisey kerd û ard ziwan ke qeyûmî kurdkî qedexe kenê, ci rê teda kenê.

Hemserekê MED-DERî Rifat Ronîyo ke Zîndanê Amedî ra tehlîye bi selamê tepişteyan pare kerd û vat: ''Kurdan seba ziwanê xo zaf bedelî dayî, têkoşîn kerd. Ma do wayîrê ziwanê xo vejîyê û neslanê bînan rê neql bikerê.''

Wekîla HDPyî Dêrsime Dag derheqê xebatanê sseba fermîbîyayîşê kurdkî de agahîyî dayî û vat: ''Ma sey sîyasetmedaranê kurdan polîtîkayanê xo yê ziwanî xurtêr bikerê. Roje roja wayîrvejîyayîş û xurkerdişê kurdkî ya. Ma do wayîrê ziwanê xo vejîyê, bi ziwanê xo qisey bikeê û binusê.''

Qiseykerdişan ra dima sînevîzyonêk ame mojnayene. Komxebate bi hawayêkê girewteyî dewam kena.