Vengdayîşê Kongreya Neteweyî ya Kurdîstanî (KNK) ser o bi desan partî, rêxistin û dezgehanê kurdîstanijan û kesayetan 8ê temmuze de 'Zoom' ser de komxebatêka hîra viraşte. Komxebate seba ke vera hêrişanê îşxalî yê dewleta tirke tewirêk bêro dîyarkerdene ameye serûberkerdene.

Netîcenameyê komxebate ame eşkerakerdene.

Netîcename wina yo:

''Dewleta tirke 15ê hezîrana 2024î de vera Metîna, Avaşîn û Zapî operasyonêkê îşxalî yo hîra da destpêkerdene.Heyf ke PDK zî rayîr dano nê îşxalî. 25ê hezîrane de zî hêrişê îşxalî derbazê safhayêka bîne bîyî. Dewleta tirke hinî seke wayîra keyeyî ya, Başûr de noqtayanê kontrolî nana ro û nasnameyanê şarî kontrol kena. Hetê bînî ra dewleta tirke erdê Başûrî ra şarê ci vejena.

Îdareyê Iraqî zî sey PDKyî hinî bîyo hemkarê dewleta tirke. Dewleta tirke wazena erdê Iraq û Başûrî îşxal bikera û biresa sînoranê Mîsak-i Mîllî.

Nika Zap, Metîna, Avaşîn û Xakurkê de şerêko çetin est o. Gerîlayî vera îşxal û qirkerdişî xo ver danê. Hêrişê dewleta tirke teyna vera gerîlayan nîyê vera pêro destkewteyanê Başûrî û serdestîya erdê Iraqî yê. Dewleta tirke nêwazena ke kurdî û kurdîstanijî azad bibê. Dewleta tirke dişmena kurdan û Kurdîstanî ya. 

Dewleta tirke DAÎŞ de hemkarîye kerdbî û paştî dabî hêrişanê ci. Dewleta tirke roja verêne ra  nata zî dişmenîya Îdareyê Xoserî yê Rojawanê Kurdîstanî kena û hêrişê ci kena. Nika zî dewleta tirke vera herêmanê Zap, Avaşîn û Metîna hêrişê pîlî dayî destpêkerdene. Heta nika vera nê hêrişan tewirêko neteweyî nêame mojnayene. Sere de PDK Îdareyê Başûrê Kurdîstanî û tay dezgehê medyaya Başûrî kenê ke nê hêrişan normalîze bikerê. La ganî na rewşa îşxalî qetî sey normalî nêra dîyene. Ma eşkenê bi yewî û paştdayîşî peynîya nê hêrişan bîyarê.''

Netîcename de nê vengdayîşî ameyî kerdene:

''-Ma sey beşdaranê na komxebate vera hêrişanê dewleta tirke tewir gênê û hetê Hêzanê Pawitişê Kurdîstanî de cagênê.

-Komxebata ma yewîya neteweyîye sey şertê estbîyayîşî vînena û veng dana ke wa  yewîya neteweyîye bêra bihêzkerdene.

-Ganî welat de û teberê welatî de ma paştî bidê Hêzanê Pawitişê Kurdîstanî û bi ruhê Kobanê îşxalê dewleta tirke yê vera Başûrî vindarnê. Coka ganî ma xebatanê dîplomasî bikerê.

-Nê prosesî de ganî ma bi ruhê seferberîye têbigêrê. Ma venga pêro kurdîstanijan danê ke tewrê pêro çalakî û xebatan bibê û bi hawayêkê topyekûnî xoverdayîşî berz bikerê.

-Komxebata ma cenga Serekîya Parlamentoyê Herêma Kurdîstanî, partîyan û dezgehanê Kurdîstanî û şarê ma dana ke wa vera hêrişanê îşxalî vinderê û artêşa tirke Başûrî ra vejê.

-Komxebata ma venga dewleta Iraqî dana ke dewleta tirke de hemkarîye nêkera, peymananê derbazkerdişê sînorî yê wextê Saddamî betal bikera, îtîrazê îşxalî bikera, warê hewayî Tirkîya rê biqefilna û seba ke artêşa tirke Başûrî ra veja tedbîran bigêrê.

-Komxebata ma venga Yewîya Dewletanê Ereban dana ke vera hêrişanê Tirkîya tewir bigêra.

-Komxebata ma venga Neteweyanê Yewbîyayeyan, Yewîya Ewrop û pêro hêzanê eleqedaran dana ke vera hêrişanê Tirkîya tewir bigêrê.

-Komxebata ma venga şarê kurdî, dostanê ci û kesanê demokratîk û wayîrwijdanan dana û vana ke 'Şima Kobanê, Girê Sipî, Efrîn û Serêkanîyê de tewirêko hol mojnabî. Nika zî ma pê hêvî kenê ke şima heman tewirî bimojnê. Şarê kurdî hewceyê paştdayîşê şima yo.'

-Komxebata ma venga kurdîstanijan û dostanê Kurdîstanî dana ke Tirkîya de têkilîyêka ekonomî nêkerê, turîzmê tirkan boykot bikerê.

-Ma ancî vanê ke hetê Hêzanê Pawitişê Kurdîstanî de yê û vanê ke 'Pawitişê Zap, Metîna û Avaşînî pawitişê Kurdîstanî yo. Ma do pêro îmkananê xo wayîrê nê xoverdayîşî vejîyê.' Ma wazenê ke pêro şarê ma, şexsîyet û dezgehanê Kurdîstanî zî heman tewirî bimojnê.''