Paytextê Iraqî Bexdad de serrgêra Fermanê 3yê Tebaxa 2014î de Konferansê 'Îdareyê Xoserî yê Şingalî' vizêr ame kerdene.

Konferanso ke bi şîarê 'Îdareyo Xoser garantîya cuya şaranê Iraqî ya' ame kerdene, serkêşîya ci komelê êzidîyan kerd. Keyeyê şehîdani temsîlkarê eşîranê Şingalî, temsîlkarê partî û rêxistinan tewrê konferansî bîyî. Konferansê Şingalê Xoserî bi netîcenameyêkî qedîya

Neticenameyê konferansî de ca dîya nê birî:

''-Goreyê Qanûnê Bingeyî yê dewleta Iraqî her netewe, şar, bawerî ûsn eşkeno îdareyê xo awan bikero. Coka Fermanê 3yê Tebaxe ra dima êzidîyan zî îdareyê xo awan kerd.

-Fermanê 3yê Tebaxe de ne pêşmergeyan ne zî artêşa Iraqî Şingal nêpawit. HPG, YPGyî şarê Şingalî reyde êzidîyî pawitî. Rixmê ney zî qirkerdişêk qewimîya. Dewleta Iraqî hema zî no qirkerdiş sey jenosîdî qebul nêkerd. Ganî hukmatê Iraqî, Parlamentoyê Iraqî û dewleta Iraqî cade Fermanê 3yê Tebaxe sey Jenosîdê Êzidîyan bişinasnê.

-Ma venga Mehkemeya Federale ya Iraqî danê ke sere de selahîyetdarê PDKyî yê ke Şingalî ra remayê û paştî daya DAÎŞî pêro mesuldaranê nê qirkerdişî muhakeme bikerê. Îdareyê Xoserî yê Şingalî 10ê hezîrana 2023yî de bire daye ke cerganê DAÎŞî muhakeme bikero. Ganî Mehkemeya Federale ya Iraqî û hukmatê Iraqî zî cerganê DAÎŞî muhakeme bikerê.

-Şingal de 83 gorê komkîyî ameyî dîyene la nînan ra teyna 46ê ci ameyî akerdene. Ganî pêr gorê komkîyî bêrê akerdene û cenazayî teslîmê keyeyî bêrê kerdene.

-Tedaya dewleta tirke, PDK û tay hêzanê mîyanneteweyîyan ra dewleta Iraqî Peymana 9ê Teşrîna Verêne îmza kerde. Peymana 9ê Teşrîna Verêne rewşa Şingalî hîna bêaram kena. Ganî hukmatê Iraqî cade na peymane betal bikero. 

-Ganî hukmatê Iraqî seba agêrayîşê êzidîyan Îdareyê Xoserî yê Şingalî de hemkarîye bikero.

-Ma venga pêro roşnvîr, nuştox, partîyanê sîyasîyan û dezgehanê demokratîkan danê ke wayîrê heqan û azadîya êzidîyan vejîyê. Wa Neteweyê Yewbîyayeyî paştî bidê xoserîya Şingalî, Îdareyê Xoserî bişinasnê û destek nêdê Peymana 9ê Teşrîna Verêne.''