Dîwanê Hemserekîye yê KONGRA-GELî derheqê hêrişanê vera Şingalî de eşkerayîyêke daye.

Eşkerayîye de ame vîrvistene ke dewelta tirke 16ê tebaxe û 17ê tebaxe de verê çimanê pêro dinya de wexto ke Serekwezîrê Iraqî Mustafa Kazimî Şingal de bi hêrişê Şingalî kerd la hukmatê Iraqî, hêzê mîyanneteweyî, Herêma Kurdîstanî vera hêrişan bêveng ê.

Eşkerayîye wina dewam kena: ''No hêriş kamca de bibîyêne dinya weriştêne payan ser. La hêzê dinya vera hêrişanê dewleta tirke yê serê êzidîyan bêveng ê. Dewleta tirke verî zî hêrişê Nêweşxaneyê Efrînî kerdbi û tede xeylêk merdimî qetil kerdbî.

Dewleta tirke ronayîşê xo ra nata qirkerdişê kurdan kena armanc. Kurdê ke gêrenê heqanê xo hetê Tirkîya ra yenê qetilkerdene, surgunkerdene, hepskerdene. Rixmê ney zî kurdî semedê heqanê xo têkoşîn kenê.

Dewleta tirke pê bahaneya 'şerê vera PKKyî' hêrişê Başûr, Rojawan û Şingalî kena.Neteweyê Yewbîyayeyî, NATO, Yewîya Ewropa û dezgehê mîyanneteweyî zî paştî danê ci. Nê hêz û dewletî semedê menfaatanê xo rayîr danê hêrişanê Tirkîya. La ganî qetî hesabê nê qirkerdişan bêro perskerdene.

Kurdî têna nîyê. Kurdan pê şorişê Têkoşînê Azadîye yê Kurdîstanî sîstemê qirkerdişî yo se serre şikna. Şarê kurdî warê mîyanneteweyî de pê têkoşînê xo bîyo hêzêko bingeyî yê herême. Kurdî amade yê ke semedê azadîya xo bedelan bidê. Îradeyo ke kurdan nêvîneno qetî do ser nêkewo.

Wezîfeyo bingeyî yê her kesî yo ke vera hêrişanê dewleta tirke hetê xoverdayîşê Şingalî de ca bigêro. Wayîrvejîyayîşê şarê êzidîyan şertê merdimbîyayîşî yo. Nê esasî ser o ma vengê şarê ma yê Vakur, Başûr, Rojhelat, Rojawanî û teberê welatî danê ke  dewleta tirke û paştgîranê ci şermezar bikerê, semedo ke şarê Şingalî bi hawayêkê azadî pê bawerî û nasnameyê xo biciwîyo, wezîfeyê exleqî û wijdanî yê her kesî yê ke deynê xo bidê êzidîyan û semedê êzidîyan têbigêrê.''