Rêxistina Partîya Herêmanê Demokratîkan (DBP) a Amedî kongreya xo ya 7. kerde. Salonê kongre de pankartê  “Bi civaka rêxistinkiri ber bi jiyana azad ve”, “Ji şerî ra na aştî hema niha”, “Hûn nikarin roja me tarî bikin”, “Dem dema yekitiya azad e” û beyraqê DBPyî ameyî daliqnayene. 

HEDEP, TJA, Dayîkê Haştîye, partîyê Îtîfaqê Kurdîstanî, temsîlkarê rêxistinanê komelê sîvîlî û xeylêk kesî tewrê kongre bîyî. Konge badê vjînayîşê dîwanî bi rezgirewtişî dest pêkerd. Ciwanan û şarê ke verê konge govende girewte Marşê Çarxa Şoreşe wende û slogana  “Bijî Serok Apo” vatî.

Hemsereka DBPyî Salîha Aydenîz bale ante muhîmîya kongre ser û nê vatî: “Vera krîz û kaosê ke sîstemê kapîtalîstî afirnayî, kurdan sîstemê xo înşa kerdî, nê semedî ra kurdî zafêr raştê hêrişan yenê. Qirkerdişê ke Îsralîl vera  Fîlîstînî keno, dewleta tirke eynî qirkerdişan vera Rojawanî kena. Êyê ke semedê Fîlîstînî veng vejenê û vera hêrişanê serê Rojawanî bêveng ê dirîyîye kenê. Şero ke ewro Rojawan de yeno rayraberdenemabênê modernîteya demokratîke û modernîteya kapîtalîste de yo. Rojawan de vera sîstemê ke serkêşîya cinîyan ameyo ronayene, hêriş yeno kerdene. Ewro dewleta tirke herra Kurdîstanî de rolê Îsraîlî kay keno. Coka ma nê hêrişan şermezar kenê. ”

Aydenîze bale ante binpaykerdişanê heqan ê zîndanan ser xoverdayîşê tepişteyan selam kerd û vat, “Zîndanî bi polîtîkayanê tecrîdî açarîyayî keyeyanê îşkence û mergî.” 
Salîha Aydenîze wina dewam kerd: “Rojhelatê Mîyanênî û Kurdîstan de têna bi rayîrê azadîye û demokrasîyî haştîye mumkun o. Mifteyê nê zî Îmrali de destê Abdullah Ocalanî de yo. Vera polîtîkayanê tecrîdî yê Îmraliyî sere de roşnvîr û nuştoxî semedê azadîya fîzîkîye ya Rayberê Şarê Kurdî Abdullah Ocalanî ganî her kes têbigêro. Ganî semedê azadîya Birêz Ocalanî her kes wirzo payan ser. Ma do payan ser bê. Seba ke Birêz Ocalan rol û mîsyonê xo bîyarê ca, ganî tecrîd cade bêro wedaritene.” 

Aydenîze bale ante muhîmîya Rayîrê Hîrêyînî ser û vat, ê do semedê serkewtişê vîjnayîşê cayîyî têkoşînî xurtêr bikerê.

Badi qiseykerdişan raporê falîyetî ame wendene û Sultane Yaray û Mehmet Şîrîn Gurbuz sey hemserekanê neweyan ê Amedî ameyî vîjnayene.