Têgêrayîşê Azadîye (Tevgera Azadî) yo ke Başûrê Kurdîstanî de gurîyeno bi tewrbîyayîşê 700 delegeyan Silêmanî de kongraya xo ya hîrêyine kerde. Kongre de qerarê muhîmî ameyî girewtene.

Kongreya ke vizêr saetanê serê sibayî de Silêmanî de dest pêkerde saetanê şanî de qedîyaye. Kongre de 16 kesî semedê heyetê rayraberdişî ameyî vîjnayene. Kongre de qerarê ke ameyî girewtene ra tay wina yê:

-Perwerde do bêro averberdene û dezgehê perwerdeyî berê zafêrkerdene,

-Komînê dewe û taxan do bêrê xurtêrkerdene,

-Semedê averberdişê ekonomîya komunî do goreyê esasanê konfederalîzmê demokratîkî de konferansêk bêro kerdene,

-Semedê kongraya neteweyîye do bi seferberîye xebatî bêrê kerdene,

-Komîsyonêko taybet do bêro ronayene ke tekîlîya bi heme îtîqat û şaran bêro averberdene,

-Derheqê kulturê kurdan yew festîvale ya zî konferans bêro kerdene,

-Xebatê pawitişê xoza do bêrê xurtêrkerdene,

-Warê weşîye de do xebetêka taybete bêrokerdene û projeyê semedê weşîya şarî do bêrê averberdene,

-Derheqê rewşa cinîyan ê herême û qirkerdişê vera cinîyan de kombîyayîş ya zî konferasêk bêro kerdene,

-Bi hewayêkê sîstemkî do roşnvîran de pêvînayîşî bêrê kerdene û fîkrê înan bêrê girewtene.