Fermandarîya Qerargehê Merkezê Pawitişê Şarî (MPŞ) semedê heme gerîlayanê Herêmanê Pawitişî yê Medya mesajêk weşena.

Mesajê Merkezê Pawitişê Şarî wina yo:

Hesabpersayîş

''Hêrişê dewleta tirke yê vera herêmanê Metîna, Zap û Avaşînî hêirşêko normal nêyo. No xurtkerdişê sîyasetê îmha û qirkerdişî yê vera şarê ma yo. Xora ma hêrişêko wina pawêtene. Badê vînîkerdişê giranî yê Garê ma zanayêne ê do semedê qesasî hêrişêkê bînî bikerê. Na bingeyî de zanayîşê îstîxbaratî ma girewtbî. Coka amadekarîya ma bibî. No hêrişê dişmenî mabênê ma û înan de do bibo meydanê hesabpersayîşî.

Armancê înan…

Bêşik o ke no hêriş bi qebûlkerdişê hêzanê komplokeran yeno kerdene. Eke naêameyêne qebulkerdene herra Iraqî de hende têgêrayîşê teyarayan û bombardumanî nêameyêne kerdene. Sîyasetê komployê mîyanneteweyî hema zî vera ma yeno domnayene. Artêşa tirke wazena ke pê nê hêrişî komployî bîyaro ca û bireso waştişanê xo. Wazenê ke pê nê hêrişî qesasê Garê bigêrê. Wazenê ke cayanê stratejîkan bifînê dest ke plananê xo yê serê Başûrê Kurdîstanî û herême bîyarê ca.Coka verî wazenê derbe bidê têgêrayîşê ma ro. Armancê înan oyo ke Gerîlayê Azadîye yê Kurdîstanî tîya ra vejê ke heme destkewteyanê kurdan tesfîye bikerê. Eke no projeyê rejîmê AKP-MHP û Ergenekonî ser bikewo eşkeno emrê xo derg bikero ke do semedê heme şaranê herême bibo tehlukeyo pîl.

Eke bin bikewê temamî de şikîyenê

Rejîmo faşîst ewro krîzêko xorî de yo, zaf zehîf o û ver bi vînîkerdişî de yo. La no rejîm wazeno pê çînkerdişê ma payra bimano. Eke qirkerdişê xo serê heme Kurdîstanî de hekîm bikero û Tirkîya pîl bikero xo keno mende. La eke nê planê înan ser mekewo do temamî de bişikîyê. Ê zî na raştîye zaf hole zanê. Coka rixmê heme zehîfîyê xo heme îmkananê xo semedê şerî şuxlulnenê. Vînîkerdişê Zap, Avaşîn û Metîna têna vînîkerdişê cepheyî nê, no vînîkerdiş do bibo vînîkerdişê rejîmê Anqara. Wina babeta muhîm a. Serkewtiş do bibo estbîyayîşê înan û vînîkerdiş bibo çînbîyayîşê înan.

Tenê xoverdayîş nê ma serkewtiş wazenê

No heqîqet semedê ma zî vîyartbar o. Eke ma sey Gerîlayanê Azadîye yê Kurdîstanî vera îşxalkeran ser bikewê. Têgêrayîşê, şar û Rayberîya ma û heme şarê Rojhelatê Mîyanênî azadîye û demokrasîyî fînenê dest. La eke cewabo ke hewce kenê ma medê dişmenî no semedê şarê ma do bibo destpêkerdişê çînbîyayîşî. No semedê şaranê herême do bibo destpêkerdişê dewrê tarî û zûlmatî. Semedê ma wina stratejîk û muhîm o. Coka ma sey Gerîlayanê Azadîye yê Kurdîstanî ganî nayî rind bizanê. No şer semedê ma destpêkerdişêko muhîm o. Nê şerî de ma têna nêwazenê xover bidê, ma wazenê dişmenî rê bidê vînîkerdene û ser bikewê. Coka seba ke no xoverdayîşo tarîxî û bimbarek ser bikewo ganî ma heme çikê destê ma ra yeno bikerê. Îmkanê ma yê serkewtişî estê. Me pê tecrube û hêzê xo eşkenê teknîk û îstîxbaratê dişmenî pûç vejê.

Dem demê azadîye yo!

Pê şerê gerîlayanê modernan ê ke heme tewiranê şerê de pîspor ê û metodanê şerê tunelî, şerê binê erdî ma eşkenê hêrişanê dişmenî veng vejê û bi taktîkanê zengînan erazîyî buşuxulnê û derbanê pîlan bidê înan ro.  Şerê ma serranê peyênan vet meydan ke eke ma nînan bîyarê ca ma eşkenê ser bikewê. Tewr peynî de şerê Heftanîn û Garê na raştîye zafêr fîna çîman ver. Gerîlayê dewrê neweyî bi cesaret, fedakarîye û zîhnîyetê Apoyî do ser bikewê. Na çarçewe de ma wazenê 2021î de netîce bigêrê. Dem demê azadîye yo! Dem demê azadîya Rayber Apoyî yo! azadîya Rayberîya ma bi xoverdayîşê gerîlayan û şarê ma mumkun o.

Nê hêrişî vera hema kurdan ê

Hetê bînî ra êyê ke vanê nê hêrişê vera Herêmanê Pawitişê Medya têna vera gerîlayan û PKKyî ya mîyanê korîya sîyasîye de yê, heqîqetî nêvînenê, ya zî bi zanayîş nêwezanê na raştîye bivînê. Eşkerayo ke nê hêrişî vera heme şarê kurdî yê. Sere de Başûrê Kurdîstanî û heme destkewteyê şarê kurdî hedefê dewleta tirke ya faşîste de yê. Dewleta tirke semedê projeyê winayênî îtîfaqê xo yê zereyî nayo ro. Stratejîya înan wina ya: Verî PKK û gerîlayê ke verê înan de asteng ê do bêrê tesfîyekerdene. Semedê qickerdişê hedefê xo têna gerîlayan kenê hedef la eslê xo de wazenê destkewteyanê kurdan werte ra wedarê.

Ma vera îşxalî xoverdayîşê netewe bimojnê

Coka vengdayîşê ma wina yo: Sey netewe ma pêro pîya vera nê îşxalî vejîyê. Ma xoverdayîşê netewe bimojnê. Sey netewe nayî rê hewceyê ma esto. Ganî şarê ma welat û teberê welatî de vejîyo meydanan paştî bido gerîlayan. Her kes eşkeno bi vatiş û çalakîya xo neteweyîye xurtêr bikero. Tewirê bînî xizmetê netewa kurdan nêkenê. Ma sey Gerîlayê Azadîye yê Kurdîstanî qerardar ê ke ma do bi perspektîfê Rayber Apoyî cewabê îşxalkeran bidê û ser bikewê. Şarê ma wa qesawet nêkero û pê bawer bo. Ma hêvî kenê ke her kes bingeyê armancê bimbarekî de têbigêro û çîyo ke hewce keno bikero.

Yew nê, 3-4 Garê!

Netîceyê nê xoverdayîşê tarîxî yê çar rojan vejîyayî werte.  Senî ke yeno zanayene xoverdayîşê Garê 4 rojî kerdbi derg û dişmenî vînî kerdbi. No şer do kilm nêbo, hîna zaf bikero derg. Beno ke heme serre ra vila bo. No şer do bikero derg û netîceya ci gird bo. Serkewtişê Garê derbêka pîle daye dişmenî ro. La semedê rijnayîşê nê rejîmê faşîstî yew Garê nêvejeno. Sey Garê 3-4 serkewtişê bînî hewce kenê. Yew nê, 3-4 Garê! Nika cayê qehremanan mekano tarîxî Zagrosî kewtî dewre. Serkewtişê Zap, Avaşîn û Metîna do peynîya dişmenî bîyaro. Xora rol û wezîfeyê na herême û xoverdayîşan nê yê.  Pê serkewtişanê neweyan ê Garê do netîceyo pîl bêro destfînayene.

Performansê gerîlayan ê çar rojanê verênan

Gerîlayan çar rojanê verênan de performanso xurt mojna. Pê keda şehîdanê ma yê qehremanan û hemrayanê ma netîceya ke nê çar rojan de ameye girewtene eşkena bibo bingeyê sekewtişî.  Bitaybetî çalakîya Qilê Piramîtî yê Avaşînî çalakîyêka serkewtîye bî. Hemrayê ma yê ke tewrê na çalakîye  bîyî man înan pîroz kenê. Bêvînîkerdişî cenazayanê dişmenî ser o ra çeke ame wedaritene. Tîya taktîk û wesayîye esta. Reyna xoverdayîşê qilanê Şehîd Serdar û Mamreşoyî zî ganî bêro pîrozkerdene. Warê Zandûra yê Metîna de zî çalakîyê serkewteyî ameyî kerdene. Ma nê hemrayanê xo zî pîroz kenê û heme embazan rê serkewtiş wazenê. Avaşîn de çar hemrayê ma yê qehremanî xoverdayîşê tarîxî de şehîd bîyî. Ma hemrayanê xo Ekîne, Çîyager, Dilşer û Asya bi hurmet yad kenê.

No xoverdayîşo tarîxî yê heme kurdan o

Xoverdayîşê nê demê tarîxî xoverdayîşê heme şarê kurdî yo. Xoverdayîşê ma yê xoverdayîşê azadîye û demokrasîyî yê şaranê herême yo. Xoverdayîşê ma yê xoverdayîşê azadîya Rayber Apo û Kurdîstanî yo. Ma têna semedê pawitişê xo û Herêmanê Pawitişî yê Medya şer nêkenê. Ma semedê serkewtişê pîlî nê xoverdayîşê bimbarekî kenê. Ewro heme şarê ma û dinya ma teqîp kenê. Ganî ma vera çimanê dinya de dersa dewleta tirke bidê ci. Nê celadê şarî yê, gonîşimitox ê. Pê rişnayîşê gonî û qirkerdişan wazenê payra bimanê. Vera faşîzmê îşxalkeran xoverdayîş bêşik zaf bimana yo. Xoverayîşo bimbarek ê hemrayanê ma do serkewtişî bîyaro. Koyanê Zagrosî de do tarîxêko newe bêro nuştene û rayraşîyayîşê ma yê azadîye bireso serkewtişî.''