Colemêrg hetê koy û wareyan ra zengîn o û şaristan de çimeyê debare yo bingeyîn heywankarî ya. Koçer û bêrîvanê ke gulane de şinê wareyan 6 mengan heywanan weye kenê, pê mast, şit, pendir û pincaran debara xo kenê. La polîtîkayanê şerî yê AKP-MHPyî ra krîzo ekonomîk her roje beno giranêr. Krîzî tesîrê bêrîvananê Colemêrgî zî kerd. 

Zeynepe Ozera ke bi serran o bêrîvanîye kena, ard ziwan ke xeylêk kesî hînî nênê wareyan û nê karî nêkenê. Ozere pare kerd ke êyê ke heywankarîye kenê nêeşkenê debara xo bikerê û vat: ''Verê cû 14-15 keyeyî ameyêne wareyê ma la nika teyna panc keyeyî yenê. Ê bînî neçare mendî ke heywanê xo biroşê. Ma pary 50 lîra dayêne wesayîtî û pê ameyêne wareyî. La nika ma 350 lîra danê. Xeylêk kesî neçare mendî ke nê karî ra fek vera bidê. Eke wina dewam bikero ez zî hînî heywankarîye nêkenê.''

Ozere da zanayene ke berhemê înan hetê madîyî ra faydeyê înan nêkenê û vat: ''Her roje vaya her çî zêdîyena. Dermanê heywanan, meaşê şiwaneyan ûsn vaya nînan tim zêdîyena. Verê cû ma seke şîyêne şayîye şîyêne wareyî la nika çew de moral çin o. Sebebê nê krîzê ekonomîkî şer û kiştiş o.''