Şubeyê Amedî yê Komeleya Heqanê Merdiman (ÎHD) raporê binpaykerdişanê heqanê merdiman ê Vakurê Kurdîstanî yê 6 mengan bi kombîyayîşêkê çapemenîye eşkera kerd.

Hetkara Hemserekan ê Pêroyîyan ê ÎHDyî Rehşane Bataray, temsîlkarê Herême Abdusselam Înceoren, Serekê ÎHDyî yê Amedî Abdullah Zeytun û îdarekarê şubeyî Ercan Yilmaz û Yakup Guven beşdarê kombîyayîşî bîyî.

Hêverî Rehşane Bataray qisey kerd û îfade kerd ke yeno xîretkerdene ke  meseleya kurdî bi metodanê şerî çareser biba. 

Rehşane bale ante tecrîdê vera Rayberê Şarê Kurdî Abdullah Ocalanî ser û vat: ''Bi dewamkerdişê tecrîdî şer zî dewam keno. Ganî reyna Ocalanî reyde dîyalogî dest pêbikerê.''

Raporê binpaykerdişan ê ÎHDyî de nê çîyî ameyî parekerdene:

''Kesêk netîceya hîşyarîya 'vindere' de merd û kesêk/e zî birîndar bi/bîye. Zîndana de 2 kesî merdî. 3 leşker û polîsî bi hawayêkê şikdarî merdî. Îdarekarêkê partîyêka sîyasî netîceya hêrişî de merd. Rojnameger û 3 xebatkarê weşîye netîceya hêrişêkî de birîndar bîyî. Şer de 14 wezîfedarê asayîşî merdî û 15 wezîfedarî birîndar bîyî. 78 endamê rêxistine merdî. Netîceya çalakîyan ê çekdaran de 15 merde û 23 birîndarî estê. Sînorî de xeylêk kesî kişîyayî. 13 kesî cemidîyayîşî ra merdî. Netîceya teqayîşê mayînî de domanêke merde. 3ê ci domanî û 12ê ci cinîyî bi temamî 19 kesî sey merde ameyî dîyene.

13 qezayî 8 reyan sey herêma asayîşê taybetî ameyî îlankerdene. 62 dewan de, 3 qezayan de, 3 şaristanan de 7 reyan qedexeyê vejîyayîşê teberî ame îlankerdene. Cenazaya endamêkê rêxistine bi PTT erşawîyaye keyeyê ci. 8 reyan gorê endamê rêxistine rijîyayî.

Herême de 20 cinîyan xo kişt û cinîyêke zî xîret kerd ke xo bikişa. 14 cinîyî şîdetê zereyê keyeyî ra merdî û 13 cinîyî zî heman şîdetî ra birîndar bîyî. Cinîyêke ameye tacîzkerdene. 8 cinîyî netîceya hêrişî de ameyî qetilkerdene, 6 cinîyî bi giranî birîndar bîyî. 4 cinîyan rê hêrişo cînsî ame kerdene û cinîyêke rê fuhuş ame ferzkerdene. 3 domanan xo kişt. 2 domanan rê zereyê keyeyî de şîdeto cînsî ame kerdene. 3 domanî şîdetê komelî ra merdî û 4 domanî zî birîndar bîyî. 204 domanan rê şîdeto cînsî ame kerdene. 2 domanî dibistane de maruzê şîdetî mendî.

61 kesî wextê destbendkerdişî de maruzê şîdetî bîyî. 22 tepişteyî maruzê îşkence û têgêrayîşê xirabî mendî. 441 tepişteyî bêsebeb ameyî surgunkerdene. Heqê 35 tepişteyan ameyî binpaykerdene.

Menganê verênan de herême de 16ê ci domanî 769 kesî ameyî destbendkerdene û înan ra 2ê ci domanî 132 kesî ameyî tepiştene. 638 keye û kargehî ameyî sereştene.''