Platformê Ziwanê Kurdkî, Cemîyetê Rojnamegeran  ê Başûrê Rojakewtene de kombîyayîşê  çapemenîye viraşt. Platformî verê kombîyayîşî eşkerayîyêk viraşte. Vervatoxê Platformê Ziwanê Kurdkî Şerifxan Cizirî ard ziwan ke şarê Kurdî wazeno ke ziwanê xo de perwerde bîvînê û no heqêko tewr esasî yê merdimî yo û vat ke ganî Kurdkî bibo zwano fermî û ma Kurdî her ca de bi Kurdkî qisey bikerê.

Cizirî derheqê plananê xebatanê xo yê ke partîyanê sîyasîyan reyde Roşanê Ziwanê Kurdî û 21’ê Adare Newroze de bikerê de qisey kerd û wina kerdî rêze:

Ganî partîyê sîyasî bi Kurdkî qisey bikerê, binusê, biwanê û kombîyayîşanê xo zî bi Kurdkî bikerê.

Ganî sîyasetmedarî na babetê de model bê û şarî zî seba naye teşwîk bikerê. Seba 21’ê Şibate bivejîyê teber, derheqê muhîmîya ziwanî de vilawekan vila bikerê. Her xebata 21’ê Adare  ya Newroze de ganî ziwanê Kurdkî  bêro xebitaneyene û no sey prensîp bêro qebulkerdene. Eşkerayîyêke do bêrê kerdene de ganî bale biancîyo muhîmîya ziwanî ser. Reyna, heme eşkera û programê ke yenê kerdene de ganî bale bianciyo heqê ziwanî ser.  Şaredarîyê ke Kurdistan de yê, bi nê amancî programan amadê bikerê û seba xurtbîyayîşê ziwanê Kurdî ganî rayberî û ardimkerîye bikerê. Ziwannasan, hunermendan, nuştoxan, akademîsyenan û rojnamegeran reyde konferans, panel û semînerî bêrê kerdene. Camî û xebatê ke derheqê dînî de yenê kerdene de Kurdkî bêro xebitayene. Seba xebatanê hemparîyan do partîyaê sîyasîyî, dezgehê dînî, dezgehê kultur û hunerî bêrî zîyaretkerdene.