Taxa Îstasyonî ya qezaya Artûkluyî ya Mêrdînî  de cayê mendişî yê Lîseyê ÎMKByî hetê leşkeranê tirkan ra şuxilîyeno ke nê leşkerî bi şikê vîrusê Korona qaşo binê karantîna de yê. Çopê leşkeran erzîyenê tax û kuçeyanê qeza. Şarê Artûluyî zî semedê lêşinîya qeza ra pê vîrusî qerqilîyeno. Şarî eşkera kerd ke înan seba ke çopan arê bida muracatê şaredarîye kerd la şaredarîye cewabêk nêda înan.

Ge ge nê çopî yenê vêşnayene zî û boya pîse qeza de vila bena. Hemwelat Sirri Şîmdîyo ke keyeyê ci dûştê cayê leşkeran de yo, pê çopan qayîl nîyo. Şîmdîyî ard ziwan ke bi rojan o ke çopî arê nêdîyenê û seba ke taxa înan herêma înan herêma karantîna ya ganî nê çopî baxçeyê lîseyî ra zî nêrê vetene.

Şîmdîyî vat: ''Vanê wa şarî hîsger bo la çopê xo erzenê tîya. Rayîrî bi temamî bi çopî dekerde yê. Wesayît û heywanî nê rayîran ra ravêrenê. Ganî nê çopî pê poşatan bêrê arêdayane la ê erzenê werteyê rayîrî. Xora ma pê vîrusî kewtî la wa ê bînî nêkewê.''