Qezaya Licê ya Amedî de wextê rezbirînan o. Emser ziwatîye û germîya zêde ra rezî zaf bereketîn nîyê û hebê enguran qij ê. Reyna zî neqrî mîyanê rezan de ronîyayî û bastêq û aqît virazîyayî.

Dewa Huseynîkî de emser mîqtarê rezan se ra 80-90 kêm bîyo. Deweka Çelebî de hemwelatîyî rezan xeripnenê, heban arê danê û dima zî neqran de girnenê. Bi nê hawayî rezanê xo kenê aqît, bastêq û eşkije. 

Sara Haran 73 serre ya û 50 serrî ya nê karî kena. Sara vana: ''Ma menga teşrîna verêne de dest pê xeripnayîşê rezan kenê. Emser engurê ma tay ê. Ma pa domananê xo rezan arê danê û girnenê. Ma pê şîrîya engûran bastêq û aqît virazenê.''

Sara adirê binê neqran kontrol kena, kêfî ser ra gêna û tene pakî kena. Sara îfade kena ke karê înan zehmet o û nê karî de tewr zaf cinîyî benê mexdûr. Sara vana: ''Rezî pê keda cinîyan virazîyenê.''