Gerîlayanê HPG û YJA Starî  derheqê serrgêra 20’in a komploya mîynaneteweyîye ya 15'ê Sibate û hêrişanê dewleta Tirkî yê vera gerîlayan de ANF’yî rê qisey kerd.

Gerîlayê HPG'yî Şahan Botanî bale ante serê hêrişanê dewleta Tirkî yê ke vera gerîlayan kena  û vat, serekkomaro Tirk Tayyîp Erdogan çiqas ke dest ra yeno bi heme hêzê xo hêrişê Kurdan keno. Artêşa Tirkî bi heme teknîkê xo nêeşkeno vera gerîlayî de netîcê bigêro û ard vîrî ke, herêma Xakurke de înan vera eskeran çalakîyê girdî kerdibî. Gerîlayê HPG'yî Botanî dewamê ci de vat, dewleta Tirkî bi propagandaya qilêrine wazena cimatî bixapêna û vat, “Çiqas hêriş beno wa bibo, ma zî vera teknîkê dişmenî tedbîranê xo gênê. Wa şarê ma baş bizano ke ma her dem xurtêr ê. Fedayîyê Rayber Apoyî do heta dilopa peyên a gonîya xo şer bikerê.”

MA DO BI ÇALAKÎYANÊ BITESÎRAN CEWAB BIDÊ DIŞMENÎ

Gerîlayê HPG'yî Welat Dilkenî zî ard ziwan ke, ê bi çalakîyanê xurtan cewabê bidê tecrîdkerdişê Rayberê Şarî Kurdî Abdullah Ocalanî û vat, “Şert û mercê ma çi benê wa bibê, ma do nîşan bidê ke dişmen çiqas tersonik o. Gerîlayî mîyanê zimistanî de çalakîyê bitesîrî kerdî. Naye ra dima zî ma do bi çalakîyanê hîna xurtan cewab bidê îqtîdarê faşîstî yê AKP-MHP’yî.

Gerîlaya YJA Starî Edesa Efrîne zî ard ziwan, dewleta Tirkî bi heme hêrişanê xo nêeşkena xoverrodayîşê gerîla bişikna û nîşan da ke, gerîla do bi nê vinitişê xo yê qerardarî, cewab bidê tecrîdî.

Gerîlayê HPG'yî Ferhad Paweyî da zanayene ke, komplaya mîyaneteweyîye ya 15'ê Sibate bi rengêkê cîyayî dewam kena û vat, “Hêriş dewam keno. Bêguman xoverrodayîşê vera hêrişê dewleta Tirkî ya îşxalkare zî bêmabên dewam keno. Bi nameyê gerîlayanê azadî, ma Leyla Guvene û xoverrodayoxanê grevê vêşanîye hemeyan silam kenê.”

XOVERRODAYÎŞO KE BI RAYBERÎYA LEYLA GUVENE DEST PÊKERDIBI HER CAYÊ DINYA RA VILA BI

Gerîlayê HPG'yî Întîkam Çîyayî bale ante serê destkewteyanê şarî Kurdî û ard ziwan,  destkewteyî heme bi saya Ocalan û Têgêrayîşê Azadîye yê Kurdî ameyê destkewtene. Çîyayî seba xoverrodayîşê grevê vêşanîye zî vat, “Xoverrodayîşo ke bi rayberîya Leyla Guvene dest pêkerd, her cayê cîhanî ra vila bi. Bi nê çalakîyan ma vînenê ke ruhê xoverrodayîşê 14'ê Temmuze hîna dewam keno. Şarê Kurdî do sereyê xo cara verê dişmenî de ro nêno.”

Gerîlayê HPG'yî Serhed Qelelî ard ziwan ke, xoverrodayîşê Leyla Guvene û çalakwanê bînan yê grevê vêşanîye zaf bimana yo.

Gerîlayê HPG'yî Harîn Oramarî zî vat, heta ke Ocalan hetê fîzîkî ra azad bibo ê do têkoşînê xo bidomnê û vengdayîşê ciwanan kerd ke verê xo bidê refê gerîlayan.