Netîceyanê rayanê xo de şarî bire daye ke DEM Partî seba Şaredarîya Êlihî Gulîstane Sonuk û Mehdî Oztuzun bibê namzet. Hemserekê DEM Partî yê Êlihî Huseyîn Sarikî verweçînayîşî ANFyî rê ercnayî.

Sarikî ard ziwan ke verweçînayîşî bîyî sebebê kelecanêkê pîlî û hîsê wayîrvejîyayîşî. Sarikî vat: ''Vernamzetanê ma esnafî, keyeyî û kargehî zîyaret kerdî, waştişê şarî goşdarî kerdî û xo dayî şinasnayene. Şarê ma eleqeyêko pîl mojna verweçînayîşan. 5 hezar delegeyanê ma raye daye û bi nê hawayî hîsêkê wayîrvejîyayîşî yo pîl vejîya werte. Şar nêwazeno ke bêro peygoşkerdene. Coka ma çarçewa rexne û pêşnîyazanê şarî de nê verweçînayîşî amade kerdî. Kêmasîyê ma est bîyê zî no proses bi serkewtişî qedîya.''

Sarikî ard ziwan ke şar qerardar o ke qeyûman bişawo û vat: ''Êlih zî ê şaristananê Kurdîstanî ra yew o ke tede polîtîkayê şerê taybetî yenê kerdene. Bi taybetî vera nasnameyê cinîyan û têkoşînê cinîyan hêrişî yenê kerdene. Vera ney ganî ma têkoşînêkê xurtî bikerê. No prosesê verweçînayîşan cewabê şarî bi ke îqtîdarî rê dayo. Ma do dormeyê partîya xo de kom bibê û bixebitê. Ma do pîya Kurdîstanî ra qeyûman bişawê.''