Rixmo ke weçînayîşanê herêmîyan de HDPyî 65 şaredarîyî qezenç kerdbî îqtîdarê AKP-MHPyî 48 şaredarîyê HDPyî bi qeyûman xesp kerdbî. Roniştoxanê Amedî derheqê weçînayîşanê herêmîyan ê 2024î û rejîmê qeyûman de ANFyî rê qisey kerd.

Firat Kaymak: Neheqîyêka pîle ameya kerdene. Merdimê weçîniteyî bi darbeya sîyasîye cayê xo ra ameyê kerdene ke no verê şar, demokrasî û heqanê merdiman de bêhûrmetî ya. Ganî qeyûmî wina bêrê dîyene. Qeyûmî destsernayîşê heqan o. Qeyûmî qetî xizmetê şarî nêkenê û ma înan ra razî nîyê.

Cîhan Turgut: Qeyûmî ma rê nêxebitîyenê. Se ra 90ê şarê Amedî xizan o. Ma wazenê îdareyê xo, bi xo biweçînê. Wa ê baş bizanê ke bi nê hawayî nêeşkenê çîyêkî bivisnê destî. Ma do merdimanê xo yê serkêşan ancî biweçînê.

Salîh Kizil: Qeyûmî teda û zorbazîye yê. Ma wazenê merdimê ma yê weçîniteyî serê şaredarîyan de bibê. Ma do weçînayîşan de cewabê qeyûman bidê.

Abdûrrahman Ertugrul: Karê qeyûman verê çiman de yê. Sîstemê qeyûman sîstemê darbe yo. Ewro çew bê zerrîya Erdoganî nêeşkeno bibo wayîrê erkêkî. Her kes bi qeyûman aciz bîyo. La şarê ma do ney bivurno.