Fermandaranê Qerargehê Merkezê Pawitişê Şarî (MPŞ) ra Amed Malazgîrtî bernameyê taybetî yê Stêrk TVyî de hêrişê dewleta tirke ya îşxalkere û xoverdayîşê gerîlayan ercnayî. Qiseykerdişê Malazgîrtî ra beşêk wina yo:

''Embazê ma 46 rojî yo têkoşînêkê pîlî kenê. Her roje şerê çetinî qewimîyenê. Dewleta tirke hêrişê Metîna, Avaşîn û Zapî kerd û wazena waranê îşxalî hîra bikera. Roje 24 saetan warê gerîlayan dîyenê bombayan ver. Xora dewleta tirke şerêkê namerdî kena. Mîsal pê 100 leşkeran şina 3 embazan ser û dima zî hêrişê hewayî dana destpêkerdene.

Zendûra de, Kêste de şer dewam keno. La artêşa tirke nêeşkena aver şora. Embazê ma nêverdenê îşxalkerî debikewê tunelan. Aseno ke no şer hema do dewam bikero. Ma wazenê verê dişmenî bigêrê û çalakîyanê xo xurtêr bikerê.

Şarê Başûrî zî vîneno ke PKK senî xo ver dano. Gerîlayan artêşa tirke kerde teng coka seba ke dewlete xo na tengîye ra bixelisna sûcanê şerî kena. Şer de zî huqûq esto la dewleta tirke cenazayanê embazanê ma rê îşkence kena, dîmenan înternet de vila kena.

PKK Başûr de esto û vera dewleta tirke ya îşxalkere têkoşîn kena. Dewleta tirke PKK kena bahane. Siba zî beno ke hêzê bînî xo rê bikera bahane. Dewleta tirke armanc kena ke heta 2023î Başûrî îşxal bikera. Dewleta tirke bi nê hawayî sey Lîbya welatanê bînan de zî krîzî vetî. Tay dewletan Tirkîya zaf peygoş kerde. Dewleta tirke ney ra hêz girewt û gamê xo zêdînayî.

Xeta Metîna de şerê tunelan yeno kerdene. Dewleta tirke vera nê tunelan pêro sûcê şerî kerdî. Gerîlayî pê komanê qijan vera îşxalkeran çalakîyan kenê û derban danê înan ro. Hêzê gerîlayan seba pûçkerdişê teknîkê dişmenî rayîr û metodanê neweyan afernenê. Dewleta tirke do nê operasyonê îşxalî rê dewam bikera.

Dewleta tirke dima ke rastê xoverdayîşê gerîlayan ameye stratejîya xo ya şerî vurnaye. Moral û motîvasyonê embazanê ma berz ê. Kurdî pêro Kurdîstan û Ewropa de wayîrê gerîlayan vejîyenê. Labelê tay xayînî seba pereyan xo roşenê û hetê dewleta tirke de ca gênê.

Ez şarê ma yo ke wayîrê gerîlayan vejîyeno selam kena. Ma wazenê Zap, Metîna û Avaşîn de dewleta tirke çin bikerê. Bedelê ci çi beno wa bo ma do ney bikerê. Xora ma her roje bedelan danê labelê ma qetî do nêverdê ke dewleta tirke Kurdîstan de ca biba.''