7 gerîlayan warê Mamreşoyî 10 rojan bi hawayêkê çêrî xo ver da, xoverdayîşê înan ser o tay dîmenî eşkera bîyî.

Hêrişanê dewleta tirke 23ê nîsane de warê Mamreşoyî yê Avaşînî de dest pêkerd. Rayberîya fermandarê Girê Şehîd Munzurî Serhat Giravî (Kamûran Alpsar / Colemêrg) de Rûkene Zagros (Sehere Bîngol / Colemêrg), Sarya Diyar (Bişenge Hezer / Şirnex), Canfeda Hesekê (Şehbaze Îzzettîn Seydo / Hesekê), Xebat Aso (Ûbeyt Mevlûdî / Kirmanşan), Zafer Tolhildan (Mûhammed Abdulkadîr Huseyîn / Qamişlo) û Kamûran Amed (Mûstafa Şîmşek / Amed) 10 rojan bi hawayêkê destanwarî xo ver da. 10 rojan nê 7 gerîlayan hêrişî ra heta sabotajî û sûîkastî pê metodanê gerîlayan Zagrosan de derbê giranî da îşxalkeran ro.

Artêşa tirke ya ke pê îrade û qerardarîya gerîlayan nêeşkaye bi rojan hewa û erdî ra çeperê şerî dayî bombayan ver. Gerîlayan pêro teknîk û hêrişî pûç kerdî.

Tay dîmenê xoverdayîşê Mamreşoyî polîtîkayanê şerê taybetî ta gemarinan ê dewleta tirke eşkera kenê. Leşkerê tirdlî dûrî ra vanê 'teslîm bibê' la gerîlayî pê fîşek û guleyan cewabê înan danê. Gerîlayî vera teslîmîyetî weriştî payan ser.

Artêşa tirke pê gazê kîmyewî hêrişê çeperanê şerî kerd. 7 gerîlayê ke 10 rojan rayîr nêda dişmenî pê gazê kîmyewî şehîd bîyî. Ma çêranê Mamreşoyî reyna bi rêzdarî yad kenê:

Serhat Giravî keyeyêkê welatperwerî yê eşîra Giravîyan de dadîya xo ra bîyo û hema ke ciwan bi tewrê xebatan beno. Embaz Serhat 2011 de verê xo dano koyan. O xeylêk waranê Herêmanê Pawitişî yê Medya de pratîk keno û beno fermandarêko marîfetin.Serhatî rayberîya xoverdayîşê Mamreşoyî kerde û pê çalakîyan zerrîya dişmenî tersnaye.

Rûkene Zagros Gever de dadîya xo ra bîye û 2014 de tewra gerîlayan bîye. Aye sey şerwanêka YJA-Starî tim xo newe ra aferna. aye xeylêk waranê Herêmanê Pawitişî yê Medya de têkoşîn kerd û zerrîya pêro embazanê xo de ca girewt.

Embaze Sarya Dîyar Hezex de dadîya xo ra bîya û rêçê birayê xp Dîyar Gafurî ser o tewrê têkoşînî bîye. Sarya heta şehadetê xo xeta çêrîye ra fek vera nêdaya.

Canfeda Hesekê de dadîya xo ra bîye û dima ke Şorişê Rojawanî de barbarîya dewleta tirke dîya tewra gerîlayan bîye. A koyanê Avaşînî de bîye tecrubeyîne û bi hawayêkê tarîxî şehîd bîye.

Xebat Aso şaristanê Kirmanşanî de dadîya xo ra bi û 2018 de tewrê gerîlayan bi. Ey Qendîlî ra heta Avaşînî tecrubeyê pîlî vistî destî û kede dare. O sey embazêko fedakar tewrê pêro waranê cuye bi.

Zafer Tolhildan Qamişloyî ra bi û 2013 de tewrê gerîlayan bi. O tewrê xeylêk çalakîyanê Avaşînî bi û xoverdayîşê tarîxî yê Mamreşoyî de tewrê karwanê şehîdan bi.

Kamûran Amed de dadîya xo ra bi û 2019 de tewrê gerîlayan bi. Ey xeylêk Avaşîn de têkoşîn kerd û sey domanêkê kurdî pê têkoşînê Mamreşoyî tarîxê kurdan de cayê xo girewt.