MEBYA-DERî ra vera destbendkerdişan nêrazîbîyayîş

MEBYA-DERî ke vera destbendkerdişê îdareker û endamanê xo nêrazîbîyayîş mojna ra vat: ''Komeleya ma pê hîsgêreyîya komelî têgeraya, vera neheqîye û şerî vejîyaya û tim haştîye û demokrasîyî pawitî.''

27ê sibate de polîsan eşt Komeleya Kultur, Yewîye, Paştdayîş û Hetkarîye ya  bi Keyeyanê ke Dergûşê Medenîyetan de Merdimê Xo Vînî Kerdî (MEBYA-DER) ser û hemserek, îdarekar û endamê ci destbend kerdî. MEBYA-DERî  vera destbendkerdişan nêrazîbîyayîş mojna ra.

Keşkerayîya ke banê komele de ameye dayene  îdarekarê HDPyî yê bajarî zî tewrê ci bîyî.Eşkerayîye de endamê komale Alî Kanikî qisey kerd.

Kanîkî vat: ''Sereştişê vera komeleya ma huqûqî nîyo coka ganî embazê ma yê ke bîlasebeb ameyî destbendkerdene cade bêrê veradayene.'' Kanîkî vist vîrî ke polîsan sereştişî de berê bînaya înan şikoto û vat: ''Komeleya ma bi destûra Wezîrîya Karanê Zereyî, Walîtîye û Masaya Komele ameye akerdene û çîyêko xelet nêkerdo. Komeleya ma pê hîsgêreyîya komelî têgeraya, vera neheqîye û şerî vejîyaya û tim haştîye û demokrasîyî pawitî.''

 Kanîkî vat: ''Rîyê şerî ra her hetê welatî rê cenazeyî şinê. Îqtîdar seba ke nayî binimno û emrê xo bikero derg hêrişê partîyanê sîyasîyan, dezgehê komelê sîvîlî û rêxistinanê şarî keno. Tewr peynî de zî bi vetişê qanûnê tewreyî caardişê antîdemokratîkî yê vera komel û vakifan kerdî fermî.  Ma nê destbendkerdişê embazanê xo sereştişê vera komeleya xo rexnê ke kenê û vang danê îqtîdarî ke wa caardişanê keyfîyan caverdo.''