Artêşa Iraqî 20ê gulane ra nata kena ke Kampa Multecîyan a Şehîd Rûstem Cûdîyî ya Mexmûrî bigêra binê ablûqa. Şarê Mexmûrî roja 6. de vera ablûqa xoverdayîşê xo rê dewam keno.

Hemserekê Meclîsê Şarî yê Demokratîkî yê Mexmûrî Yusif Karayî derheqê babete de ANFyî rê qisey kerd. 

Karayî da zanayene ke nê prosesî de mabênê înan û hukmatê Iraqî de tay meseleyî est ê la ganî meseleyî pê dîyalogan çareser bibê. Karayî pare kerd ke xîretê ablûqakerdişî waştişê dewleta tirke yo û vat: ''Dewleta tirke zî keyeyê Barzanîyan zî bi zelalî ney anê ziwan. Verê nê kerdişan de Neteweyê Yewbîyayeyî (NY), Koalîsyono Mîyanneteweyî û dewletî bêveng ê. Kampe de çend rojan ra nata alozîye est a. Ablûqakerdişê kampe ma rê heqaret o, meşrû nîyo û bêrûmetî yo. Xoverdayîşê ma ra dima mîqtarê têgêrayîşê artêşe kêmîya la dewam keno. 

Kampa Mexmûrî qaşo binê pawitişê NYyî de ya. La wezîfedarê NYyî tedaya Barzanîyan û PDKyî ra vengê xo nêkenê. Tîya de heqê cinîyan, heqê domanan û heqê multecîyan binpay benê. Dewleta tirke û keyeyê Barzanîyan pê raporanê sexteyan NY bêveng kerd. Xoverdayîşê şarê ma ra dima 2018 ra dima reya verêne temsîlkarê NYyî ameyî kampe. Ma nînan de qisey kerd û neheqîya ke Iraq ma rê keno, bi zelalî eşkera kerde. Ma waşt ke wa ê goreyê qanûnanê multecîyan têbigêrê.

Ma hê prosesêkê cidîyî ra derbaz benê. Eke sey neteweya kurdan û Kurdîstanî ma wayîrê yewbînan vejîyê eşkenê heqê her çî ra bêrê. Ma venga şarê ma yê welatperwerî danê ke wa paştî bido ma, paştdayîşî pîl bikero.''