Komîteya Şar û Bawerîyan a KCKyî bi wesîleya menga Muharremî  eşkerayîyêke daye. Eşkerayîye wina ya:

''Ma kewtî menga Muharremî ku bawerîya elewîtîye de wayîra cayêkê girîngî ya. Muharrem seba misilmananê şîa zî mengêka îbadetî ya pîl û ercîyaye ya.

Muharrem vîranêkerdişê zalimîya Kerbela ya. Rojê vîrvistişê cîyatîya mabênê Îsamê qesr-îqtîdarî û pawitoxanê edalet û têdûştî ya. Ma hêvîdar ê menga Muharremî xeta xoverdayîşî ya Kerbela ser o derbaz biba. Ma venga pêro terefgîranê heq û heqîqatî danê ke vera Yezîtanê nê çaxî tewrê Huseyînê modernî bimojnê.

Rojhelatê Mîyanênî de yezîtîye dewam kena. Dewleta tirke pê îqtîdarê AKP-MHPyî bîya dewletêka yezîtî. Mabênê Anqaraya nikayêne û Şamê yezîtî de qet yew cîyatîye çin a.

Erdogan qesra xo ya bi hezaran odayan de sey Yezîtê wayîrê qesra keske plananê talan, destsernayîş, fîtne û qirkerdişan keno. Dewleta tirke teqîbkerdoxê ê zalimanê ke Yezît seba qetilkerdişê Îmam Huseyînî û embazê ci erşawitbi, kiştoxî rêxistin kerdî. Pê destê nê kiştoxan her roje kurdî û elewîyî kişîyenê, sey Yezîtî vera her keso ke sey ey nêfikirîyeno hêriş yeno kerdene.

Yezîtê ke dewleta tirke îdare kena elewîyan rê gef wanenê, înan rê teda kenê.

Elewîyî hetê dewleta tirkeya ke tradîsyonê yezîtî temsîl kena ra xeylêk reyî ameyî qetilkerdene. Nika zî înan ser de  tehlukeyê qirkerdişî esto. Muharremê emserînî pê rewşêka tehlukeyîne dest pêkerd. Elewîyî têna pê têkoşînê Îmam Huseyînî eşkenê nê tehlukeyî berteref bikerê. Bi na wesîle ma venga her kesî danê ke xeta Huseyînî de bibo wayîrê tewrê Huseyînî. Ma venga ê kesanê ke Îmam Huseyînî xo rê kenê rayber danê ke wa vajê 'Eke zulm estbo Huseyînî zî do estbê. Nameyê têgêrayîşê xo ser o ma pê bawer ê ke têkoşînê vera dewleta tirke yeno manaya dewamkerdişê tradîsyonê Kerbela yo. Coka vera faşîzmê AKP-MHPyî yê yezîtî caardişê têkoşînî demokrasî yeno manaya newekerdişê raştîya Huseynî.

Muharemê emserîn pê qirkerdiş, teda û tepiştişî, pê şewat, xizanî û bêkarîye dest pêkerd. Na hişmendîye Tirkîya de binê hukmê hişmendîya yezîtî de ya. Ma pê bawer ê le elewîyî menga Muharemî bikerê wesîleya xurtkerdişê yewîya îbadet û xizmetî.

Ma pê bawer ê ke elewîyî do nê Muharemî de xoverdayîşê Kerbela zêdêr fam bikerê . Ma pê bawer ê ke oyo ke menga Muharemî fîraz  keno têkoşîn o. Ma wazenê îfade bikerê le cewherê Rayîrê Elewîtîye no yo.Êyê ke pê xoverdayîşê Kerbela bawer kenê  her tim cepheyê têkoşînê demokrasî û azadîye de bîyî. Ma pê bawer ê ke xoverdayîşê Kerbela seba her keso ke heq û heqîqatî zaneno, xoverdayîşê vera yezîtanê modernan xizmeto tewr fîraz o.

Bi wesîleya îbadet, vîrameyîş û şînê menga Muharemî ma reyna hêvî kenê ke roje û xizmetê Îmam Huseyînî nika ra pê qelema heqî bêrê nuştene. Ma venga zerrîwazanê Huseyînî danê ke pê têkoşînê vera zulmî wayîrê Hz. Huseyîn û şehîdan vejîyê. Bi wesîleya roje ma eşkera kenê; pê têkoşînê azadîye yê Kurdîstanî ke têgêrayîşêkê Huseyînî modernî yo, wayîrê vîrameyîşê înan vejîyê. Ma venga her kesî danê ke tewrê cepheyê têkoşînê demokrasî û azadîye bibo, vera yezîtîye xo ver bido.''