Bi wesîleya serrgêra xespkerdişê Şaredarîyanê  Bajaranê Pîlan ê HDPyî yê  Amed, Mêrdîn û Wanî,  Mêdîn de çalakîya protestoyî ameye kerdene.

Çalakîya ke parlamenterê HDPyî û îdarekarê DBP û TJA tewrê ci bîyî verê banê HDPyî yê Mêrdînî de ameye kerdene.

Dima ke Hemserekê HDPyî Mêrdînî Salîh Kuday tewrbîyayoxî selam kerdî Hemşaredarê HDPyî Qersî Ayhan Bîlgenî qisey kerd. Bîlgenî vîst vîrî ke 48 şaredarîyê ameyî xespkerdene  17 embazê înan zîndan de yê û vat:  ''Xelisîyayîşê şarî îdareyê demokratîkî yê herême de yo.''

Serekwekîla Koma HDPyî Merale Daniş Beştaş zî ard ziwan ke rejîmê qeyûmî rijîyayo û vat: ''Bi cakerdişê qeyûman îradeyê 4 mîlyonan ame binpaykerdene. Ewro nameyê xirabye  qeyûm o ke çerçewa planê çokdayîşê MGKyî yê 2014î de ame amadekerdene. Walî Mustafa Yamano ke sey qeyûmî Mêrdîn de ame cakerdene bajar serûbin kerd. Dizdîya tewr pîle yê Tirkîya nê di serran de tîya ameye kerdene. Nika Walî yaman bi qerarnameyan ancîya merkez ke nameyê ci bêro pakkerdene. Eke modelê înan ê qeyûmî  esto, ma de zî modelê demokrasî esto. Xoverdayîşê ma do dewam bikero.''