Fermandarîya Qerargehê Merkezê Pawitişê Şarî (MPŞ) bi wesîleya serrgêra Komployê 15ê Sibate de eşkerayîye daye û nê vatî:

''Şexsê Rayber Apoyî ke şarê ma bertengê çînkerdişî ra xelisna û ci rê zanayîşê azadîye û ruh dayî qezenckerdene û kerd şaro têkoşêr, Komployê 15ê Sibate ame kerdene ke nasname, îrade û azadîya ma destê ma ra bêrê girewtene. Ma serrgêra ci ya 22. de nê komployî şermezar kenê. Şehîdê ma yê 'Şima nêeşkenê tîja ma tarî bikerê' yê ke vera komployî bedênê xo kerdî sîper, dormeyê Rayberîya ma de bîyî çeperê adirî, ma şexsê înan şehîdanê xo yê qehremanan ê ke têkoşînê 22 serran de destanî afernayî, bihurmet yad kenê.

15ê sibate ya 1925î de qirkerdişê vera Şêx Seîdan ra heta Komployê Mîyanneteweyî yê vera Rayber Apoyî yê 15ê sibate ya 1999î şarê kurdî seserre binê karda qirkerdişî de cuwîya. La Komployê 15ê Sibate her hetî ra qirkerdişanê verênan ra wetêr bi. No komplo hêrişê çînkerdişê şarê kurdî bi. Coka kurdan û dostanê înan 15ê Sibate sey 'roja sîyaye' mezgê xo de ca kerd û çirey qebûl nêkerd.

Rayber Apoyî bi zanayîşê xo yê xorî lez tesbît kerd ke hêzanê hegemonan û dewletanê serdestan qey komplo kerd. Bi sebrê pîlî yê Rayber Apoyî û xoverdayîşê ci yê bêhempayî yê Îmraliyî û bi  têkoşînê xeta qehremanîye yê şar û têgêrayîşê ma komplo pûç ame vetene. Têna komplo pûç nêbi Têgêrayîşê Azadîye yê Kurdîstanî serkêşîya Rayber Apoyî de nê 22 serran de pê têkoşînê xo her hetî ra  pîlêr bi. Şarê ma destkewteyê pîlî vistî dest. Komplokeran vînî kerd. Têgêrayîşê Apoyîyî heme şarê azadîwaştoxî girewtê binê tesîrê xo. Şerê Şarê Şorişgêrî ke ma xeta îdeolojî û ruhê Apoyîyî de aver berd, hetê stratejîk û taktîkî ra xo newe kerd. Performansê şerî û gerîlatîya modernîteya demokratîke xeylêk aver şî. Gerîlayê Azadîye yê Kurdîstanî vera komployî bi kîn û hersî serra 22. ya komployî de Kurdîstan de têkoşîno gird kerd.

La komplo pûç bêro vetene  zî hema bi temamî nêqedîyayo. Hêzê Komplokerî sey vizêrî ewro zî qirkerdişê kurdan wazenê. Komplokerî û paştgêrê înan her firsend de bi rayîr û metodanê cîya cîyayan hêrişê şarê ma, ercanê şarê ma û Têgêrayîşê Azadîye yê Kurdîstanî kenê. Senî ke şarê ma û şaranê dostan û têgêrayîşê 22 serrî yo ver komployî xover danê û têkoşînê destankî danê, serra 23. de zî do têkoşîn bêro pîlkedene û  hemleya ''Dem Demê Azadîye yo'' do netîce bîgiro, sîtemê îşkenceyê Îmraliyî do bêro perçekerdene û Rayber Apo bêro azadkerdene.

Her gerîla û fermandarê Gerîlayê Azadîye yê Kurdîstanî ke çar hetanê Kurdîstanî de xoverdayîşî rê serkêşîye kenê do semedê serkewtişê hemleya ''Wextê Azadîye yo'' têkoşîn bikerê. Seba ke komplo bi temabî bêro çînkerdene gerîla do xeta cuya Apoyîyî ra çirey tewîz medo, bi azîmê pîlî, bewerîye, qerardarîye û waştiş û ruhê fedayîyî wayîrê wezîfeyê xo yê dewrî bivejîyo. Bi na îdîa û qerardarîye ma do semedê azadkerdişê Rayber Apoyî, xeta Şerê Şarê Şorişgêrî xurtêr bikerê û wezîfe û berpirsîyarîya xo bîyarê ca.''