25ê hezîrane de qezaya Depe ya Xarpêtî de bi girdîya 5.3î erd lerzabi û tesîrê erdlerzî ra tay dewanê Depe û dewanê qezaya Gêxî yê Çewlîgî de keyeyî texrîb bibî. Hemwelatîyê ke keyeyê înan texrîb bîyê neçare manenê ke şewan teber de bimanê. Selahîyetdaran erdlerzî ra dima dewî zîyaret kerdî, sozî dayî la hema zî sozê xo nêardî ca.

Rêxistinanê HDPyî yê Çewlîg û Depe nê dewan de cigêrayîşî kerdî. Heyet de Hemsereka HDPyî ya Çewlîgî Arzu Firat zî estbî. Firate îfade kerd ke Depe de 10 keyeyî texrîb bîyî û hema zî erzlerzê qijî dewam kenê. 

Firate pare kerd ke Çewlîg serê xeta erdlerzî de yo û vat: ''Herême de hûmara xeyman kêm a. Hema zî rêçê erdlerzê 1971î nêşîyî. Rixmê hende çîyan zî dewlete tedbîrê qîmî nêgirewtî. Tîya de tay banî virazîyayî la şarî rê fayde nêkenê. Semedê rantî virazîyayê. Ganî rewşa Çewlîgî ser o bêro vindertene û tedbîrê raştikênî bêrê girewtene.''

Hemserekê HDPyî yê Depe Veysî Saritagî zî îfade kerd ke ê xîret kenê ke hewcedarîyanê şarî peyda bikerê. Saritagî vat: '' Erdlerzî ra dima qeymeqam, leşker û partîyanê bînan tîya zîyaret kerd. La armancê înan reklam bi. Nînan qetî rewşa şarî pers nêkerde, têna fotografê xo girewtî. Seke ê ameyê hê xebitîyenê. Merdimî nêeşkenê nê keyeyanê xirabeyan de bimanê. Ganî şarî rê banî bivirazîyê.''