Endamê Komîteya Tekîlîyanê Teberî yê Kampa Şehîd Rustem Cûdîyî (Mexmûr) Saît Çomlekî derheqê zext û tehdîtanê vera Mexmûrî de ANFyî rê qisey kerd.

Çomlekî bale ante rewşa peyêne ya Mexmûrî ser û vat: ''Xora vera Mexmûrî bi serran o zext û ambargo est ê. Roja ke ma bîyî multecî ra nata tim PDK û dewleta tirke sey astengî verê ma de yê. Bi serran o ma raştê hêrişê nê wird hêzan yenê. Pîya bi nê zextan tim hêrişê hewayî yê dewleta tirke yenê kerdene.  Hîrê serrî yo ambargoyê PDKyî est o. No ambargo hetê sîyasî, ekonomî û komelkî ra zî tesîrê cuya şarê ma keno. Ma şik kenê ke vera kampa ma planê hêrişanê neweyan est ê.''

Saît Çomlekî  ard ziwan ke şar rîyê dormegirwetiş û ablûqa ra semedê caardişê hewceyanê xo cehd keno ke rayîro bînî a bikero û vat: ''Di serrî yo ma kenê ke rayîranê neweyan bivînê. Biney hal kerdî. Sere de Mûsûl, Bexdad û Basra de îmkanê karî ameyî vînayene. Rîyê tengkerdişê xeta Kerkûrî ra şar û karkerî nêeşkayî şirê Silêmanî. Coka ma şîyî herêmanê bînan ê Iraqî. Ge ge nê rayîran de zî semedê ma astengî vejîyayî. Hinî rayîrê ma çînê ke ma şirê bajaranê Iraqî.''

Çomlekî bale ante tehdîtê DAÎŞî yê vera Mexmûrî ser û nê vatî: ''Beno ke ge ge herême de tehdîtê DAÎŞî kêmîya la çirey nêqedîya. No zî şik anceno xo ser, qey  ge zêdîyeno û ge kêmîyeno? Yeno cehdkerdene ke verê DAÎŞî bêro akerdene. Têgêrayîşê DAÎŞî tew zaf waranê PDKyî de beno. Şar zî  nê vîneno. Xora tekîlîya ci bi makamanê Iraqî zî eşkera yo. Iraq ma hîşyar keno ke ma xo vera DAÎŞî bipawê. Ma binê pawitişê Iraqî de yê. Iraq eşkeno ma bipawê. Ma nêzanî xo senî bipawê. Tehdîtê DAÎŞî rojanê peyênan de zêdîya. Sîvîlî, şivanî yenê remnayene. Ma hedefê DAÎŞî yê. Badê serkewtişê Rojawanî yê vera DAÎŞî înan ma kerdî hedef. Bi waştişê qirkerdişê pîlî di rey hêrişê kampe kerd. Bi têkoşînî şarî ser nêkewtî.''

Çomlekî ard ziwan ke PDK û Tirkîya Iraqî verdenê şarê Mexmûrî û vat: ''Hêrişê ke vera Têgêrayîşê Azadîye yenê kerdene, ma rê zî yenê kerdene. Ma zî hedefê nê hêrişan de yê. Rixmo ke ma binê pawitişê Iraq û Neteweyê Yewbîyayeyî (NY) de yê Tirkîya hêrişê kampe kerd û hêrişê ci dewam kenê. Pêvînayîşanê mabênê selahîyetdaranê Iraq,MÎT û Tirkîya Iraqî ser o zaf tesîr kerd. Tirkîya Iraqî vera ma kena de û verdena ma yo. Înan waşt dormeyê kampe pê têlan bigêrê la nêrazîbîyayîşî şarî verê nê girewt.  Bi serran o ma binê şertanê zehmetan de yê la ma çirey her çî qebul nêkerd.''

Endamê Komîteya Tekîlîyanê Teberî yê Kampa Şehîd Rustem Cûdîyî Saît Çomlekî  vist vîrî ke bi waştişê PDK û dewleta tirke Şingal de dês yeno viraştene û vat: ''Ma nê dêsî qebul nêkenê û paştî danê şarê Şingalî. Dormegirewtiş, ambargo û ablûqayî şerm ê. Vervejîyayîşê şarê Şingalî tewirêko raşt o. Mexmûr de zî dês û têlî hewce nêkenê. Ma zirar nêdanê herême. Gama ke ma dî dormeyê ma yeno têlkerdene ma cade wuriştê payan ser.  Ma zanê nê bi waştişê PDK û Tirkîya yenê kerdene. Ma tim vera neheqîyan payan ser ê. Ma milê xo çewt nêkenê, vera zextan tim tewir ramojnenê.''