Hemwelatîyanê Kampa Multecîyan a Şehîd Rûstem Cûdîyî (Mexmûr) hêrişê dewleta tirke yê vera Nêweşxaneyê Sikniyê yê Şingalî pê rayraşîyayîşêkî şermezar kerd. Girseyî verê Keyeyanê Şehîdan ra heta berê Ofîsê Neteweyan ê Yewbîyayeyan çalakîya rayraşîyayîşî kerde.

Çalakîye de fotografê Rayberê Şarê Kurdî Abdullah Ocalanî, alayê PKKyî, pankarta 'Wayîrê Şingalî vejîyê, Fermanê 74. tesdîq meke' ameyî kiriştene.

Verê Ofîsê NYyî de deqayêkê rêzgirewtişî ra dima Hemşaredarê Mexmûrî Bedran Pîranîyî eşkerayîye wende. Eşkerayîye de ame vatene ke bêvengîya Iraq û NYyî ya vera nê hêrişî paştdayîşê înan ê bi Tirkîya eşkera kena. Pîranîyî pare kerd ke Peymana Şingalî ya 9ê Teşrîna Verêne ya 2020î nê hêrişî caardî, verê hêrişanê serê Şingalî akerd.

Çalakîye pê slogananê sey 'Şehîdî nêmirenî' û 'Biciwîyo xoverdayîşê Şingalî' qedîyaye.

Hemşaredara Kampa Multecîyan a Şehîd Rûstem Cûdîyî Rojîne Benek ANFyî rê qisey kerd û venga pêro êzidîyanê Şingal, Ewropa û dinya da ke wa abigêrê Şingalî, wayîrê Şingalî vejîyê. Beneke vat: ''Şarê Mexmûrî heta peynî paştî dano Şingalî. Wa êzidîyê her cayî bi taybetî ê êzidîyê ke kampanê PDKyî de manenê wa wurzê payan ser û verê xo bidê Şingalî.''

Mamosta Xelîl Karayî zî hêrişê vera Şingalî şermezar kerdî û vat: ''Tirkîya verê gerîlayan û xoverdayîşê şarî de bêçare mende coka hêrişanê winasênan kena. Wa dişmen bizano ke ma do qetî verê înan de milê xo çewt nêkerê.''