Dewleta tirke ya îşxalkere saetanê serê sibayî de hêrişê Kampa Multecîyan a Şehîd Rûstem Cûdîyî ya Mexmûrî kerd. Hêriş de cinîyêke birîndar bîye.

Şarê Mexmûrî hêrişê dewleta tirke ya îşxalkere protesto kerdî. Şaro ke verê Dezgehê Keyeyanê Şehîdan de ame têhet hêrişî protesto kerdî. Tîya Hemserekê Meclîsê Şarê Mexmûrî Yusuf Karayî eşkerayîye daye.

Yusuf Karayî vîst vîrî ke dewleta tirke no hewte di rey hêrişê Mexmûrî kerd û vat: "Hêrişo verên vera camî, yê diyînî vera banê Rojhat Salihî bi. Hêrişo ke ewro serê sibayî ame kerdene de cinîyêka extîyare birîndar bîye. Ma tîya ra dost û dişmenanê xo rê vanê ke dewleta tirke ya faşîste sey cinawirê ke bîyo har yena ma ser û hêriş de sînor nas nêkena. Na kampa ke 30 serrî yo pabesteya Iraqî ya zafê ci cinî, doman, extîyar û ciwan ê. Ma veng danê Kurdîstan, Iraq û rayapêroyîya mîyanneteweyî ke wa hêrişanê vera kurdan vindarnê.

Tim vejîyenê televizyon vanê Îsraîl qirkerdiş keno, domanan kişeno la kerdişanê dewleta tirke ya îşxalkere nêvînenê. Dewletê mîyanneteweyî, dewletê cîranî, dewleta ke ma tede yê veng danê Îsraîl ke wa qirkerdiş mekerê. Wird hêrişê dewleta tirke yê ke zereyê nê hewteyî de vera Kampa Multecîyan a Şehîd Rûstem Cûdîyî ameyî kerdene, nêvînenê û vera ci veng nêvejenê.”

Eşkerayîye bi slogananê  ‘Bijî Serok Apo’ ,’Bimire Xiyanet’, ‘Bijî Berxwedana Mexmûrê’ qedîyaye.