Yewîya Hunermendan û Komîteya Kulturî ya Herêma Cizîre serrgêra 32. ya wefatê ci de hunermend Mihemed Şêxo yad kerd. Merasîmê yadkerdişî Zanîngehê Rojava yê Qamişloyî de ame kerdene.

Têgêrayîşê Komelê Demokratîkî (TEV-DEM), Yewîya Roşnvîran a Herêma Cizîre, endamê Yewîya Hunermendan û keye û embazê Hunermend Mihemed Şêxoyî tewrê merasîmî bîyî.

Endamê Yewîya Hunermendan Selam Îbrahîmî merasîm de ard ziwan ke serba hunerê kurdan Şêxo têkoşer û xoverdayoxêk bi.

Hemserekê TEV-DEMî Xerîb Hisoyî zî pare kerd ke Şêxoyî pê hunerî tarîxê kurdan pawit û peyê xo de mîrasêko pîl verda. Hisoyî vist vîrî ke Şêxo zî terefgîrê yewîya neteweyî bibî û ê do seba armancê ci xebitîyenê.

Birayê Şêxoyî Hac Hemîd Şêxoyî beşdaran rê sipas kerd û îfade kerd ke Mihemed Şêxo seba pêro kurdan xebitîya.

Dima sînevîzyonêk ame mojnayene û Remezan Omerî û Sefqan Orkêşî deyîrê Şêxoyî vatî.

Hunermend Mihemed Şêxo 1948 de dewa Xecokê ya Qamişloyî de dadîya xo ra bi û 9ê adara 1989î de Qamşlo de krîzê qelbî ra dinyaya xo bedilnaye. Şêxo peyê xo de 120 eserî verdayî.