Serkêşîya DEM Partî û DBPyî de Stadyumê Tevfîl Sirri Gurî yê qezaya Akdenîzî yê Mersînî de mîtîngê  ’Azadîya Seba Haştîye’’ ame kerdene. Xeylê şaristanan ra merdimî tewrê çalakîye bîyî. 

Mîtîngî bi slogananê sey “Bijî Serok Apo”, “Bê Serok jiyan nabe” û “Jin, jiyan, azadî” û bi coşî dest pêkerd. Şarî bi kincanê neteweyîyan mîtîng de cagirewt. Hêverî hunermend Kadîr Çat vejîya sehne ser. Dima Komîteya Amadekarîye ra Emrullah Şamî qisey kerd. 

Şamî vat: ‘’Wa kesêk nêmiro, armancê ma haştî û azadî yo.’’

Hemsereka DEM Partî ya Mersînî Bedrîye Kuş girse selam kerd û vat ke vengê haştîye Anqara ra ameyo eşnawitene.

Vervatoxa Meclîsê Cinîyan ê Mersînî Bedrîye Kuş şar selam kerd û bale ante girîngîya azadîya Rayber Apoyî ser. Aye vat: ‘’Ma Mersînî ra Îmrali selam kenê. Heta ke Abdullah Ocalan azad bibo ma do têkoşînê xo rê dewam bikerê.

Hemserekê DBPyî Keskîn Bayindirî zî xîtabê girseyî kerd û vat: ‘’Ma seba azadî û haştîye ameyî têhet. Xoverdayîşê ma nika reseno netîce. Netîceya têkoşînê ma de Tirkîya de prosesêko newe dest pêkeno. Abdullah Ocalanî reyde hîrê pêvînayîşî ameyî kerdene. Nînan de Birêz Ocalanî vat ke o amade yo ke şerî biqedîno. Ganî no vengê haştîye bêro eşnawitene. Roje roja azadîye ya. Ganî hinî seba çareserîya meseleya kurdan azadîya Birêz Ocalanî bêra caardene.’’

Dima Hemsereka DEM Partî Tulaye Hatîmogullari qiseykerdişê xo de bale ante pêvînayîşanê bi Îmraliyî ser û vat: ‘’Her kes mesajê Birêz Ocalanî meraq keno. No şar bi serran o seba azadîye têkoşîn keno. Birêz Ocalan wayîrê ê hêzî yo ke haştîye bîyaro ca. La hukmato ke qalê haştîye keno qeyûman tayîn keno û Rojawan dano bombayan ver. Ma venga hukmatî danê ke zulm û tedayan ra fek vera bido. No destê haştîye yê Birêz Ocalanî derg kerdo girîng o. Birêz Ocalan seba haştîye veng dano. Elewîyî, kurdî, muxalefet, cinî û camêrdî zî haştîye wazenê. La îqtîdar çita wazeno. Ganî cewabê ney bêro dayene. Ma nameyê haştîye, azadîye û edaletî ser o Îmraliyî selam kenê. Ma seba domananê xo haştîye wazenê. Ma tîya de sozê ney danê. Ma do welatêkê azadî, demokratîkî û haştîyaneyî pîya awan bikerê.’’

Qiseykerdişê Tulaye ra dima mîtîng qedîya.