MPŞ: Binkewtişê rejîmê faşîstî yê Garê destpêkerdişê peynî yo

MPŞyî vat: ''Senî ke badê vînîkerdişê Zapî yê 2008î artêşa tirke vesayetê xo vînî kerd, vînîkerdişê Garê yê 2021î zî do semedê rejîmê faşîstî bibo destpêkerdişê peynî yê.''

Fermandarîya Qerargahê Merkezê Pawitişê Şarî (MPŞ) derheqê hêrişê îşxalî yê vera Garê û xoverdayîşê gerîlayan de eşkerayîyêka hîraye daye.

Detayê eşkerayîya MPŞyî wîna yê:

''10ê sibate de saetanê şefeqê sibayî de vera Garê hêrişê îşxalî ame destpêkerdene. Hêrişê hêzanê dewleta tirke yê 4 rojan 13ê sibatê saetanê şewe de qedîyayo. No hêrişo ke hetê rejîmê AKP-MHP-Ergenekonî  ra ame kerdene bewlîyo ke hedefeyê ci yê giranî yê sîyasîyî estbî. Ma tîya derheqê nê hedefanê sîyasîyan de qisey nêkenê. La nê hêrişî de hetê leşkerî ra çîyê neweyî estê.

Hêrişê îşxalî semedê îmhakerdişî yo

Rejîmo faşîsto ke tengayî anceno bi teknîkê xurtî waşt ke pê nê operasyonî netîceyanê sîyasîyan bîfîno dest. Coka rîsk girewt çim û hêriş plan kerd. Vera heme Garê 4 rojî bombardumanê giranî ameyî kerdene. Artêşa tirke hedef kerd ke herême de bibo vila  tede bibo mende, hem zî waşt ke esîran bifîno dest. Înan hole zanayêne ke ê tîya ra nêeşkenê esîran weş bifînê dest la rixmê nayî no operasyon kerd. Eşkera yo operasyon semedê xelisnayîşê esîran nê semedê îmhakerdişê înan ame kerdene. Înan plan kerd bi ke helqeyêka stratejîke ya  Garê de xo ca bikerê û bibê mende. Xora Erdogan û Bahçelî tim xo sey serkewte ramojnenê ke emrê xo bikerê derg.  Pê nê operasyonî zî waşt ke eynî çî bikerê. No operasyonê înan o ke semedê înan stratejîk bi merhaleya tewr berze de ame plankerdene û sey hêrişê taybetî ame rêxitinkerdene. Hêzê ke waro ke qala ci yena kerdene hakîm ê hayîya înan zî nê hêrişî ra bibî û înan paştî zî daye artêşa tirke ke netîceya qetîye bêro girewtene.

Dişmenî rê derbê pîlî ameyî pirodayene

No plano xayîn ê dişmenî ke bi mengan ame amadekerdene, serkêşîya fermandaro qehreman Şoreş Beytuşşebapî de hetê hêzanê ma yê gerîlayan ra zaf pêt ame cewabkerdene û hema gama verêne de derba pîle werde.  Serê herême de pê paştdayîşê ÎHA û SÎHAyan 40 teyarayê şerî herême bombarduman kerdene ke dewleta tirke bireso hedefê xo. Hêzanê ma gerîlayê ke Garê de yê bi ruhê fedayî yê Apoyî, bi westayîya pîle, taktîk û afernayîye û bi tewirê têgêrayîşê raştî hêrişê înan pûç vetî. Nûqtayê ke temasê germinî qewimîyayî de darbê pîlî dişmenî rê ameyî pirodayene. Rixmo ke şertê zimistanî semedê gerîlayan zehmet bî reyna ame ramojnayene ke gerîlayê ke pê tewirê neweyî şer kenê tim serkewte yê. Sey Cengê Heftanînî tîya zî rixmê îstîhbarat û teknîkê dişmenî hêrişê înan pûç ameyî vetene.

6 gerîlayî semedê pawitişê esîran şehîd bîyî

Hêzanê ma hetêk ra verê dişmenî girwtêne ke wa herême ra vila mebo hetê bînî ra îşxalkeranê ke dormeyê kampa esîran a dewa Sîyanê girewtbi, dormeyê înan girewt.  Dewleta tirke pê hêrişê hewayî yê giranî hêzê xo pawitene.  Vera kampa esîran zî verî hêrişê hewayî kerd dima ra waşt ke erdî ra bikewê de. Coka heta zereyê kampe pêkewtişî ameyî kerdene. Qet çew nêeşkeno îdîa bikero ke pêkewtişanê bi rojan de esîrî weş bêrê pawitene. 6 embazanê ma heta peynî semedê pawitişê esîran şer kerd û şehîd kewtî. Netîce de 12 esîrê ke endamê hêzanê asayîşê tirkî yê û yew tepişteyo demdemî yê Başûrê Kurdîstanî cuya xo vînî kerde.

Dewleta tirke merdeyî gule kerdî

Bitaybetî roja çarine de hema ma tesbît nêkerdo ke senî, bado ke di kesî teslîmê dişmenî bîyî artêşa tirke bi tewirêkê wehşîyî hêrişê kampe kerd û bi şuxulnayîşê gazî waşt ke netîce bîgiro. Pê hêzê xo nê, înan waştêne pê teknîk û gazî ser bikewê. Vindertişêko tersûnêk werte de yo. Badê hende gazî merdimê ke cuya xo vînî kera reyna guleyî nayî sereyê înan a. Dewleta tirka ke meydanê şerî de bin kewte, nêeşkeye bikewo kampe dima ke êyê ke ameyî destfînayene zanayîş da, bi tewirê leyminî resaye zereyê kampe.

Vînîkerdişê Garê destpêkerdişê vernî yo

Dewleta tirke ya ke merdimîye ra nasîbê xo nêgirewto, seba ke raştîya xo binimno û prestîjê xo bixelisno medimanê xo zî qetil kena. No zîhnîyet do verê tarîxî de hesab bido. Semedê îqtîdarî xo qijanê şarî keno qûrban. Hêrişê îqtîdarî yo wehşî yê vera Garê bi temamî bin kewt. Rejîmo faşîsto ke tim şarî xapîneno û xo sey serkewteyî ramojneno Garê de derbê pîlî werdî. Hêrişê 4 rojan de înan waştişê xo dest nêfîna. Hetê hêzanê ma ra pirnika înan erdî de sawixîyayî. Senî ke bado ke artêşa tikre 2008 de Zap de vînî kerd, vesayetê xo vînî kerd, vînîkerdişê dewleta tirke yê Garê yê 2021î zî do semedê rejîm faşîstî do bibo destpêkerdişê peynî yê.

37 leşkerê tirkî ameyî kiştene

Nê şerê 4 rojan de hetê hêzanê ma ra ame tespîtkerdene ke 37 vînîkerdeyê artêşa tirke estê. Reyna bi desan birîndarî zî ameyî vînayene. La seba ke tay tîmanê ma hema ke tekmîl nêdabi şehîd bîyî hûmara raşte destê ma nêkewte. Beno ke hûmara merdeyanê dişmenî hîna zaf a. Na hûmara ke ma danê hetê hêzanê ma ra ameya teyîtkerdene. Hûmara qetî ya. Reyna di helîkopterê skorsky zî hetê hêzanê ma ra ameyî derbkerdene.

15 embazê ma yê qehremanî şehîd bîyî

6 embazê ma ke serkêşîya fermandaro qehreman hemra  Şoreşî de  kampe pawitêne pê xoverayîşê destankî  û tarîxî şehîd bîyî. 5 embazê ma zî wextanê cîya cîyayan de xoverdayîşê vera hêrişê dişmenî de şehîd bîyî. Reyna wexto ke dişmen herême ra remayne, 3 embazê ma ke teberê warê operasyonî de şîyînê wezîfe, 1 embazê ma zî mewzîyêka cîya de hêrişê hewayî de şehîd bîyî. Operasyonê çar rojan de 15 embazê ma ke bi hewayêkê qehremankî şer kerdêne şehîd bîyî. 2 kesî zî kewtî destê dişmenî. Nasnameyê embazanê ma yê şehîdan do rayapêroyîye dir bêrê parekerdene.

Nameyê esîranê ke hetê dewleta tirke ra ameyî kiştene

Leşker, polîs û endamê MÎTî yê esîrê ke pêkewtiş ameyî kiştene nameyê înan wîna yê: Adil Kabakli, Aydin Kose, Huseyîn Sari, Mevlût Kahvecî, Mûhammed Salih Kanca, Muslum Altintaş, Sedat Sorgûn, Sedat Yabalak, Semîh Ozbey, Suleyman Sûngûr, Umît Bicir û Vedat Kaya. Reyna hemwelatîyê ma Cotyar Mushîn o duhukij o ke sey demdemî tepişte bi ey zî cuya xo vînî kerde.

Heme esîr û tepişteyê ke hêrişê rejîmê AKP-MHPyî de şehîd bîyî ma keyeyanê înan rê seweşîye wazene. Wa heme şarê Tirkîya û şarê ma bizano ke 6 serrî yo ma nê esîrî pawitêne. Aqibetê înano ke teberê îradeyê ma de qewimîya ra ma berpirsîyar nîyê. Selahîyetdaranê rejîmê tirkî qerarê hêrişê da û plan kerd. Ê do verê tarîxî de hesabê nayî bidê.

Xoverdayîşêko pîl û tarîxî

Sey netîce; Garê de vera têknîkê dewrî de îradeyê mîlîtanîye yo ke bi îdeolîjîya Apoyî dekerde yo xoverdayîşo pîl û tarîxî ame dayene. Me şexse fermandar hemra Şoreşî de heme şehîdanê xo yê qehremanan yad kenê. Sere de keyeyê nê hemrayanê fedayîyayan heme şarê welatwerî yê Kurdîstanî rê serweşîye wazenê. No xoverdayîşo tarîxî eserê şehîdanê ma yê qehremanan o. Ma na netîce înan rê deyndarê. Şehîdê ma do sey meşaleyê serkwtişî  tim têkoşînê ma de biciwîyê.''