Fermandarîya Qerargehê Merkezê Pawitişê Şarî (MPŞ) derheqê leşkeranê esîran de eşkerayîyêka nuştekîye daye.

Eşkerayîye wina ya:

''10ê sibate de dewleta tirke ya kolonyalîste vera warê Garê yê Herêmanê Pawitişî yê Medya operasyonê hêrişî da destpêkerene û 14ê sibate de serê sibayî artêşa tirke bin kewte û xo apey girewt. No dişmeno ke armanc kerdêne Garê de ca bido xo gerîlayanê azadîye yê Kurdîstanî vera xîretê bêexlaqî yê dişmenî xoverdayîşanê tewr pîlan ê tarîxî ra yew kerd û bi hawayêkê tûjî cewabê dişmenî da.

Wextê nê operasyonî de vera kampa ke nê warî de ya û tede esîrê şerî estê hêrişo xedar ame kerdene. Kampe 10ê sibate de saete 5.00 de bi giranî dîyaye bombayan ver, dima zî erdî ra vera ci hêriş ame kerdene. Hêzanê ma yê na kampe seba ke xo û esîran bipawê binê bombardumanê giranî de zî vera îşxalkeran cewabê raştî dayî û bi hawayêkê bitesîrî da dişmenî ro. Artêşa tirke ya îşxalkere nê derban ra dima xo apey girewt û rixmo ke zanayêne tede esîrî estê pê teyarayanê şerî kampe daye bombayan ver. Bombardumanê 3 rojan, pêkewtişanê teber û zereyî ra semed tay mensubê MÎTî, polîs û leşkerê ke destê ma de esîr bîyî merdî. Her keso ke hayîya ci pê leşkerîye esto, hol zaneno ke hêrişanê winasênan ra dima kes nêeşkeno a kampe ra weş û war vejîyo. Armancê nê hêrişanê vera kampe xelisnayîşê esîran nê îmhakerdişê înan bi. Tek mesuldarê qetilbîyayîşê nê merdiman Hulusî Akar o ke bira nê hêrişî daye.

Ê nika seba ke nê hêrişê bêmerdimîye, xirabî û binkewtişî mîyan bikerê zûran kenê. La ê se kenê wa bikerê nêeşkenê raştîyan mîyan bikerê. Rayaumûmîye hol zanena ke ma sey têgêrayîş heta ewro qet zerar nêda esîran. Rixmê hêriş û bombardumananê giranan ê vera Herêmanê Pawitişî yê Medya ma tim esîrê kampanê ma pawitî.

Wexto ke hêrişanê îşxalî dest pêkerdbi ma rayaumûmîye reyde pare kerd ke kampa esîran zî etde warê Garê maruzê bombarduman û hêrişanê giranan maneno. Rixmo ke keyeyanê esîran veng dewleta tirke da û waşt ke operasyonî ra fek vera bida hêrişan bi israrî dewam kerd. Rîyo raştikên ê dewleta tirke ya faşîste reyna eşkera bi ke na dewlete merdimîye ra dûrî ya, bêwijdan a û eşkena bi rehetî merdimanê xo zî bikişa. Wayîrê hîşmendîya faşîste do verê şaranê Tirkîya de qetî hesab bidê.

Xora netîceyê giringî yê hêrişanê îşxalî yê vera Garê û xoverdayîşê gerîlayan estê. Bîlançoya peyêne û detayê nê şerî nêzdî de do bêrê zelalkerdene û rayaumûmîye reyde bêrê parekerdene.''