Fermandarîya Qerargehê Merkezê Pawitişê Şarî (MPŞ) bi wesîleya serrgêra Hemleya 15ê Tebaxe eşkerayîyêka nuştekîye daye. Eşkerayîye wina ya:

''Ma serrgêra 37. ya Hemleya 15ê Tebaxe ya ke Roşanê Gandarbîyayîşî yo, sere de afernayoxê ci Rayber Apoyî rê, pêro şarê ma, keyeyanê şehîdan, dostanê şarê ma, merdimîya averwaze û pêro embazanê ma yê têkoşînî rê fîraz kenê. Ma serra 38. de pêro embazan rê serkewtiş wazenê.

Hemleya 15ê Tebaxe gamêka tarîxî ya û semedê şarê Kurdîstanî destpêkanê girîngan îfade kena. Bêguman nê pêro serkewtişî sayê şehîdanê ma de ameyî destvistene û resayî nê rojan. Coka ma şexsê Fermandar Egîdî (Mahsum Korkmaz) de pêro şehîdanê xo ver de rîyê xo anê war, sozê xo yê seba şehîdan reyna anê ziwan. Ma qerardar ê ke xeta şehîdan ser o şorê û vîrameyîşê înan pê caardişê Rayberîya Azade û Kurdîstanê Azadî bipawê.

Hemleya 15ê Tebaxe vera Planê Şark Islahatî û Cuntaya 12ê Êlule semedê pawitişê şarê ma û destvistişê azadîye dîyaye destpêkerdene. Guleyo verên ê Hemleya 15ê Tebaxe semedê şarê ma bi destpêkê qewimîyayîşan ê pîlan. Hemleya 15ê Tebaxe têna çalakîyêka leşkerî nêbîye hemleya pawitişê meşrûyî yê neteweyî bîye. Hemleya 15ê Tebaxe şaro ke ver bi çinbîyayîşî şîyêne rê mudaxele kerd. Na hemle her çî ra verî vera hişmenîya koledarîye û teslîmîyetî vejîyaye. Nê serewedaritişê modernî yê kurdan pê qerardarî, bawerî û ruhêkê pîlî dest pêkerd, prosesê xoverdayîşê ci verê çinbîyayîşê kurdan girewt û nê gandarbîyayîşî xo reyde mîyanê komelê kurdan de şorişê fikr, şorişê komelkî, şorişê cinîya azade û demokrasî aver berdî.

Sere de îqtîdaro faşîst AKP-MHPyo ke wazeno herême de bibo hêzêko hegemon hêzanê kolonyalîst û qirkeran Hemleyan 15ê Tebaxe de peynîya xo dî. Nê hêzî vera şarê na nê rojan de hêrişanê pîlan kenê. Nê hêzî hetêkî ra tecrîdê vera Rayberîya ma kenê giranêr hetêkê bînî ra zî dînamîkanê şarê ma pê tepiştiş û teda pelçiqnenê. Nînan reyde a raşte nê hêzî vera Gerîlayanê Azadîye yê Kurdîstanî şerê îmha yê topyekûnî kenê, bi nê hawayî kenê ke qewimîyayîşanê Hemleya 15ê Tebaxe wedarnê û Kurdîstan de sîyasetê qirkerdişî aver berê. Hedef û armancê înan o verên pê tekonolojîya xo, îstîxbarat û hêzanê paramîlîteran, pê hêzanê hemkaran ê kurdan gerîlayanê azadîye bin bikerê û kurdan qir bikerê. No rejîmo faşîst pê destekê hêzanê hegemonîkan ê Modernîteya Kapîtalîste wazeno konseptê hêrişî aver bero. Coka têna Vakurê Kurdîstanî de nê pêro parçeyanê Kurdîstanî de hêrişê xo zêdîneno.

La Gerîlayê Azadîye vera pêro hêrişan pê fedakarî xo ver danê, semedo ke hesreta şarê ma bîyarê ca xîret kenê. Dima ke 10ê sibate de hêrişê vera Garê ameyî pûçkerdene 23ê nîsane de vera Zap, Avaşîn û Metîna hêrişî dîyayî destpêkerdene û xoverdayîşê vera nê hêrişan  dewam keno. Artêşa tirke ya  faşîste nê 110 rojan de pêro metodê gemarinî yê şerî ceribnayî la rixmê xîretan zî nêeşka îşxalê xo temam bikera û herême ser o hukm bikera. Şexsê mîmarê Serkewtişê Garê Şoreş Beytuşşebabî de ma fermandaranê xo yê pîlan bi rêzdarî yad kenê, ma pêro embazanê ke Sîyanê, Mamreşo, Aris Faris, Cîloyê Biçukî, Zendûra, Werxelê û xeylêk cayan de destanan nusenê selam kenê.

Gerîlayê Azadîye yê Kurdîstanî serra 38. ya Hemleya 15ê Tebaxe pê rûmetî pêşwazî kenê. Esasê Paradîgmaya Rayber Apoyî de gerîlayê HPGyî xo goreyê hewcedarîyanê nê çaxî amade kenê. Nê gerîlayî ewro pê newebîyayîş û xorinîya xo vera pêro teknolojîya avere û hêrişan eşkenê xo ver bidê û ser bikewê. Gerîlayê HPGyî yê ke xo ser Gerîlayê Modernîteya Demokratîke îfade kenê pê tecrube û taktîkanê xo eşkenê hesabê hêrişanê vera şarî bipersê. Xora xoverdayîşê Avaşîn, Zap û Metîna ney îsbat kenê. Gerîlayê Azadîye yê Kurdîstanî dewrê neweyî yê têkoşînî de dost û dişmenî rê do bimojnê ke ê wayîrê hêzê serfîrazî yê. Coka serra 38. ya 15ê Tebaxe do biba serra qewimîyayîşan ê pîlan!

Pê na bawerî û hêvî ma reyna Roşanê Gandarbîyayîşî yê 15ê Tebaxe fîraz kenê, ma pêro hêzanê têkoşêran rê serkewtiş wazenê.''