Fermandarîya Qerargehê MPŞyî bi eşkerayîyêke serrgêra Hemleya 15ê Tebaxe fîraz kerde. Mesaj wina yo: 

''Serrgêra 40ine ya Hemleya 15ê Tebaxe Rayber Apoyî, keyeyanê şehîdanê ma rê, şarê ma yê welatperwerî rê, dostanê ma rê û hemrayanê ma rê fîraz ba. Ruhê xoverdayîşî yê Zîndanê Amedî serkêşîya Fermandarê Bêmergî Egîdî de bi Hemleya 15ê Tebaxe resa koyanê Kurdîstanî û pêro bindestan rê na hemle bîye hêvî. Şarê ma hinî na roje sey Roşanê Gandarbîyayîşî fîraz keno. Nê esasî ser o ma şexsê Fermandar Egîdî de pêro şehîdanê ma bi minet û hûrmetî yad kenê. Ma ancî soz danê ke armancanê şehîdanê xo ser bivisnê. 

Bi guleyê verênî yê Fermandar Egîdî gorî Kurdîstan de ameyî rijnayene, perdeyê tarî ameyî warardene, hêvî ameye afernayene û meşaleya azadîye ameye tavistene. Şarê ma vera îşxalkeran bi hêzê şerêkî yo serkêş. Dişmenî bi metodanê cîyayan hêrişê gerîlayanê ma kerd la ancî zî gerîlayan bi ruhê Apogîrî xo ver da û cewabo lazim da dişmenî. Hemleya 15ê Tebaxe reyde şarê ma zîncîrê koletîye şikna, kanwazîye wedarite û dest pê rayraşîyayîşêkê çêrîye kerd.

Gerîlayê Azadîye yê Kurdîstanî nê ruhê serkewtişî yê 15ê Tebaxe asta tewr berze de temsîl kenê. Embazê ma xoverdayîşêkê destanwarîyî kenê û tarîxê azadîye nusenê. 7 serrî yo embazê ma Herêmanê Pawitişî yê Medya de şer kenê û Başûrî vera îşxalkeran pawenê. Embazê ma bi ruhê Egîdî plananê dişmenî xeripnenê. Xoverdayîşê embazanê ma serra 40ine ya hemle de resa a aste ke hinî SÎHAyê dişmenî zî yenê îmhakerdene û gerîlayî warê hewayî kontrol kenê. 

Dewleta tirke ya kolonyalîste do rijîyayîşî ra nêxelisa. Gerîlayê Azadîye yê Kurdîstanî bi Egîdbîyayîşî serra 41ine ya têkoşînî de asta tewr berze de xo ver bidê. Ma ancî Roşanê Gandarbîyayîşî yê 15ê Tebaxe fîraz kenê û soz danê ke 'Rayberê Azadî, Kurdîstanê Azadî' bîyarê ca.''