Fermandarîya Pêroyî ya Merkezê Pawitişê Şarî (MPŞ) derheqê xoverdayîşê gerîlayan ê vera Herêmanê Pawitişî yê Medya de eşkerayîyêke daye.

Eşkerayîya MPŞyî wina ya:

''Hêrişê ke dewleta tirke ya îşxalkere 23ê nîsane de dayê destpêkerdene ewro kewenê roja 100. Bêguman armanco verên ê dewleta tirke tasfîyeya Têgêrayîşê Azadîya Kurdîstanî, çinkerdişê destkewteyanê kurdan o û îşxalê sînoranê Mîsaki Mîllî yo. Eşkera yo dewleta tirke seba ney hêzanê komplogeran û kurdanê hemkaran ra paştî gêna. Dewleta tirke hedef kerd ke verî Herêmanê Pawitişî yê Medya îşxal bikera dima zî pêro Başûrê Kurdîstanî îşxal bikera. LA sere de Mamreşo û Zendûra Avaşîn û Metîna de xoverdayîşêko pîl ame kerdene û hewesê îşxalkeran pûç bîyî. Prosesê xoverdayîşî yê gerîlayan netîceyê girîngî vetî werte. Xoverdayîş ewro roja 100. de vera îşxalê tirkan bi îradeyêk. 

Caardişê taktîkanê dewrê neweyî yê Gerîlatîya Modernîteya Demokratîke û pê çêrîya Şoreş Beytûşebab, Serhat Giravî, Delal Dixwaz û Rêber Zinaran no serkewtiş ame destvistene. Gerîlatîya dewrê neweyî îsbat kerd ke gerîlayî eşkenê vera her tewirê şerê îşxalkeran vinderê. 

Nê 100 rojan de rixmo ke artêşa tirke hende cergê paramîlîterî, teknîkî şuxilnayî nêeşkaye Avaşîn de hêrişê îşxalî bikera. Nika Werxelê, Girê Sor, Avaşîn û xeta Stûnê de têgêrayîşê gerîlayan ney îsbat keno. No prosesê xoverdayîşî  rayberîya fermandar Serhat Giravî û Saryayan de ewro resa astêka tewr berze. Artêşa tirke Dolê Konferansî û Dolê Mara de bênetîce mende,  seba ke Werxelê û Girê Sor de netîce bigêra xîret kerd. 2 mengî yo Werxelê û Girê Sorî  de rixmo ke çekê kîmyewî û teknîkî şuxilîyayî îşxalkerî nêeşkayî ser biikewê. Fermandar û şerwanê tunelanê şerî yê Werxelê û Girê Sorî pê ruhê fedayî têgêrenê. Ma nînan selam kenê, ci rê serkewtiş wazenê. Xoverdayîşê ma yo nikayên rîpelanê tewr rûmetênan ê tarîxî de ca gêno.

Eşkera bi ke şerê erazî yê çalakîya hêrişê Pîramîtî yê Avaşînî rayberîya embaz Şerzan Qaşurayî de netîceyê pîlî vetî werte.

Reyna embazanê ma rayberîya Bawer û Delalî de Kela Bêdewê û Cîloyê Biçûkî de pê takrîkanê neweyan verê dişmenî girewt. Caardişê nê taktîkan zî bi xo serkewtişêko pîl ê embazan o.

Destanê çêrîye yê Rêberan û Têkoşeranê ke dormeyê destanê Zendûra yê Warê Xabûrî de ame kerdene, seba kifşbîyayîşê nê netîceyan cayêko girîng girewt.

Bi taybetî 2 hewteyanê peyênan de çalakîyê xurtî yê başî vejîyayî werte. Na çarçewe de;

Ma pêro embazan û fermandaranê ke boxazê Şehîd Canşêrî yê xeta Avaşîn-Werxelê 16ê temmuze de çalakîya hêriş-mîyandekewtişî bîyî fîraz kenê.

Ma pêro embazanê ke 22ê temmuze de Girê Koordîne yê Metîna de di baskan ra tewrê çalakîye bîyî fîraz kenê.

Ma pêro embazanê ke 26ê temmuze de vera îşxalkeran Girê Şehîd Axîn û Şehîd Şahanî yê Xakûrkê de tewrê çalakîya mîyandekewtişî bîyî fîraz kenê.

Ma pêro embazanê YJA-Starî yê ke 27ê temmuze de xeta Geverî ya Wergenima de vera wesayîtê îşxalkeran tewrê çalakîya sabotajî bîyî û ser kewtî fîraz kenê.

Reyna ma pêro embazanê ke tewrê çalakîya Hemleya Egîdê Botanî yê Botanî bîyî û kede daye fîraz kenê.

Ma pêro embazanê ke Vakurê Kurdîstanî de tewrê çalakîya vera Qereqolê Xozat-Amutka bîyî fîraz kenê û keda înan selam kenê.

Nê prosesê girîngî yê tarîxê ma yê têkoşînî de ma wazenê bîyarê ziwan ke bi taybetî Zap, Metîna û Avaşîn de xoverdayîşê 100 rojan serkewte yo, hêrişanê îşxalî tarûmar keno. Ma xoverdayîşê embazan teqdîr kenê û nînan ra berdewamîya serkewtişan ê pîlan wazenê.

Embazê ercîyayeyî;

Bêguman kêmasî û bêqîmîyê nê prosesê xoverdayîşî estê. Erkê ma yo esas o ke ma nê kêmasî û bêqîmîyan raşt bikerê û xoverdayîşê xo bivisnê serkewtişî. La nika ra Zap, Avaşîn, Metîna de sey Serkewtişê Garê netîceyî vejîyayî werte. Tarîxê şarê Kurdîstanî û têkoşînê têgêrayîşê ma de heta nika xoverdayîşo winasên ê vera teknolojîyêka pîle nêamebi kerdene. Hêzê ma yê gerîlayê ke îdeolojîya Rayberîye ser o têgêrenê pê taktîkanê dewrê neweyî ewro modelêkê neweyî yê xoverdayîşî awan kenê. Coka eşkera yo ke hêzê ma do heqê kêmasîyanê xo ra bêrê û serkewtişî bîyarê ca.

Dewleta tirke vera xoverdayîşê bêhempayî yê gerîlayan zehmetan ancenê û kewte tengasîye. Dewlete hetêjî ra xîret kena ke binkewtişê xo binimna hetêkê bînî ra zî kena ke zereyê kurdan de şer veja. No hêzo ke 100 rojî yo nêeşka Avaşîn îşxal bikera xîret kena ke na raştîya xo rayaumûmîye ra binimna. Coka ewro xîret kena ke Başûr de vera gerîlayan cepheyêkê diyînî abikera.

Na çarçewe de manadar a ke hêzê PDKyî peyê xoverdayîşê gerîlayan de têgêrenê û hêzê xo arê danê. Seke ma qirkerdişê Konya de dî AKP-MHPyî  pêro waran de dişmenîya vera şarê ma kerda polîtîkaya esase. Xelisnayîşê nê îqtîdarî şarê ma rê îxanet o. Hem na rewşe hem zî serebûtê warê Xelîfanî hetê menfaatanê neteweyîyan ra tehlukeyê vera şarê ma mojnenê. A raşte eke nê hêrişê îşxalî yê dewleta tirke bin bikewê verî do hêzanê Başûrî bihêz bikerê û pêro şarê ma ser bivisnê.

Ma na babete de seba ke PDK xo planê gemarinî yê dişmenî ra dûrî bigêro û dişmenanê şarî rê hemkarîye mekero xeylêk xîretî mojnayî û hema zî pê sebrê pîlî nê xîretan mojnenê. La serebûtê peyênî rewşe kenê giranêr. LA rewşe se bena wa biba çew nêeşkeno binkewtişê kiştoxê kurdan Hulusî Akarî  û artêşa tirke binimno.

Heta peynî ma pê bawer ê ke embazê ma vera kayanê dişmenî bi tedbîrî têbigêrê, netîceyanê taktîkanê dewrê neweyî hol biercnê û bi hawayêkê qetî xoverdayîşî ser bivisnê. Pê na bawerîye ma şima, şexsê şima de pêro embazanê Vakurî û Herêmanê Pawitişî yê Medya zerrî û canî ra selam kenê. Nê prosesê girîngî yê tarîxê ma yê têkoşînî de şima rê serkewtiş wazenê.''