Meclîsê Ciwanan ê HDPyî yê Mûşî ciwanan reyde qezaya Milazgîrî de bînaya HDPyî de çarçewa kampanyaya ''Seba awankerdişê ameyoxê azadî têbigêrê'' kom bi. Bîna de pankartê bi nuşteyê ''Seba awankerdişê ameyoxê azadî têbigêrê'', ''Seba cinîyanê ke maruzê tacîz û tecawuzî benê têbigêrê'' ameyî akerdene. Wekîlê HDPyî ya Mûşî Şevîne Coşkun û Gulîstane Kiliç Koçyigit, îdarekarê HDPyî zî tede xeylêk kesî tewrê şayîye bîyî. Şayîye bi deqayêkê rêzgirewtişî dest pêkerd.

Hemsereka HDPyî ya Milazgîrî Fatma Ozkan nameyê Meclîsê Ciwanan ser o eşkerayîye wende û vat: ''Çareserîya meseleyan Îmrali de ya. Ganî cade tecrîdê vera Ocalanî bêro wedaritene û ey reyde pêvînayîşî dest pêbikerê. Ciwanê kurdî vera hêrişan  xeta xo ya tekoşînî kenê pîlêr. Ma venga ciwanan danê ke vera polîtîkayanê fuhuş, tacîz, tecawuz, qetilkerdiş, qeyûm, asîmîlasyonî yê îqtîdarî her ca de têbigêrê, faşîzm birijnê, têkoşîn pîl bikerê. ''

Dima zî Wekîle Şevîne Coşkun qisey kerd û vat: ''Vera cinî û ciwanan hêrişî dewam kenê. Dezgehê ciwanan yenê girewtene, ciwanê ma yenê tepiştene. Metropolan de zî bi kundox, ajanî yeno xîretkerdene ke ciwanî partîye ma ra dûrî vinderê. Ma seba ciwanîya azad û demokratîke pîya têkoşîn bikerê û ser bikewê.''

Şayîye bi deyîranê Koma Pel qedîyaye.