Namzedê HDP'yî yê hemşaredarîya Baglarî ya Amedî Zubeyde Zumrute û Zeyat Ceylan ANF‘yî rê qisey kerd.

Zubeyde Zumruta ke cuya aye ya sîyasîye Amedî de derbaz bîya, vat ke hayrê înan îhtîyacanê bajarî ra esta. Zumruta ke serra 1994 ra nata tîya ,Baglar de xebitîyena  vat  mi nasnameyê xo yê sîyasî Baglar de nas kerd. Hem keda mi seba Baglarî esta, hem zî yê Baglarî mi ser o esta.“ Şarê Baglarî reyde babeta îdareyê cîyayî de wazena ke kar bikera, coka bîya namzede.

Zumrute ard ziwan ke, îdareyê cîyayî de temsîlkarîya şarê muhîm a û vat, “Wexto ke şar tewrê ci nêbo, ne şaredarî ne zî sîyasetî de ti eşkena ser bikewe. Eke merdim biwazo cayê de ser bikewo, ganî şarî bikewo ci. Fikrê şarî esas o û ganî munaqaşa zî na çarçiwa reyde bêro kerdene. Heme karê ke do ma bikerê nê esasî ser o ganî bingê bigêrê.”

Zeyat Ceylane zî ard vîrî ke 18 serrî yo o qezaya Baglarî ya Amedî de ya û vat, “Baglar hetê sixletîye ra qezeya tewr girdî ya Amedî ya. Serranê 90’î de şerê qilerînî ra serkewte koçkerdişo tewr zêde ver bi Baglarî bi. Coka persê ekonomî yê qezaye roje bi roje zêdetir bîyê. Goreyê qezayanê bînan feqîrîye tîya de hîna bîye zafe. Hetê îqtîdarî ra heta nika zaf ameye mexdurkerdene û hîna zî yenao mexdurkerdene. Ma  goreyê waştiş, esas û tespîtan şarî do gaman bierzê.’’

ZUBEYDE ZUMRUTE KAM A?

Zumrute serra 1967’î de qezaya Dara Hêne ya Çewligî de ameya dinya. Dimayê darbeya eskerî ya 12'ê Êlule mecbur bi keyeyê xo ra koçê Çûkûrova kenê. Serra 1986’î ameye Amed û dest bi karanê sîyasîyî  kerd. Zumrute serra 1994’î de karê xo qezaya Baglarî de dewam kerd û cayê awankerdişê baskê cinîyan ê sîyasetê Kurdî de girewt. Mîyanê DEHAP, HADEP, DTP û BDP'yî de zî cayê xo Meclîsê Partîye û Heyetê Rayberdişê Merkezî de girewt.

ZEYAT CEYLAN KAM O?

Zeyat Ceylan 1968’î de qezaya Hezro ya Amedî de ameyo dinya. Unîversîteya Sertî de beşê mamostanîye qedêna û 2 serrî zî Şirnexî de mamostayîye kerde. Serra1998 de ame Amed û heto yew ra mamostayîye kerde, hetê bînî ra tewrê karê xurtbîyayîş û musnayîşê Kurdkî kerd. Tewrê karê Kurdî-Der, Egîtîm-Senî bi. Serra 2016’î de bi qerarnameyê KHK’yî karî ra ame eştene û karê xo yê serê ziwanî bi rengêkê hîna profesyonel dewam kerd.