Merkezê Îrtîbatî û Çapemenîye yê HPGyî nasnameyê 3 şehîdanê Avaşînî eşkera kerdî.

Eşkerayîye wina ya:

''Dewleta tirke ya îşxalkere 23ê nîsane de vera Eyaletê Avaşînî operasyonê îşxal û qirkerdişî da destpêkerdene. Nê prosesî de embazanê ma yê warê Şehîd Serdarî vera hêrişanê dişmenî pê îradeyêkê zixmî têkoşîn kerd û derbê giranî dayî dişmenî ro. Embazanê ma Gelhat, Ernesto û Delîlî pê xoverdayîşê xo seke dişmen kerd gêj. Dişmenî pê metodanê bêexlaqan vera embazanê ma gazê jehrînî xebitnayî û înan rê xîyanet û teslîmîyet ferz kerd. La rixmê metodanê bêexlaqan ê artêşa tirke ya kolonyalîste embazanê ma Ernesto, Gelhat û Delîlî  pê bawerîyêka pîle heta nefesê xo yê peyênî vera dişmenî şer kerd, sey milîtanê fedayî yê Apogîrî cewabê teslîmîyet û artêşa kolonyalîste da û şehîd bîyî.

Nasnameyê embazanê ma yê şehîdan wina yê:

Nameyê Qodî: Ernesto Zagros Name û Peyname: Ozan Ekîncî Cayê Bîyayîşî: Wan Maye-Pî: Nazîfe – Abdulselam Tarîx û Cayê Şehadetî: 5ê Gulana 2021î / Avaşîn

Nameyê Qodî: Gelhat Gabar Name û Peyname: Mehmet Kadrî Ezen Cayê Bîyayîşî: Şirnex Maye-Pî: Kudrete– Hasan Tarîx û Cayê Şehadetî: 5ê Gulana 2021î / Avaşîn

Nameyê Qodî: Delîl Amed Name û Peyname: Mehmet Burakmak Cayê Bîyayîşî: Amed Maye-Pî: Fehîme – Zeki Tarîx û Cayê Şehadetî: 5ê Gulana 2021î / Avaşîn

Embazê ma Ernesto Wan de dadîya xo ra bîyo. Embaz Ernesto 2014 de wextê hêrişanê DAÎŞî de tewrê gerîlayan bi. A roje ra heta şehadetê xo embaz Ernestoyî tim Zagrosan de wezîfe kerd û wextêkî ra pey bi gerîlayêko marîfetin. Embaz Ernestoyî xeylêk çalakîyan rê rayberîye kerde û tim xîret kerd ke pratîkanê felsefeya Rayber Apoyî bîyaro ca. Embaz Ernestoyî hêrişanê vera Avaşînî de bêmabên xo ver da û bi mîsalo zelal ê Hemleya Bazanê Zagrosî.

Embaz Gelhat Şrinex de dadîya xo ra bîyo û vera Planê Çinkerdişî yê 2015î tewrê gerîlayan bi. Embaz Gelhatî Xoverdayîşê Xoîdarekerdişî de bi fedakarî têkoşîn kerd, vera dişmenî milê xo nêard war. Embaz Gelhat pê bawerîya xo ya serkewtişî embazanê xo rê bi mîsal û her war de bi çimeyê moralî yê embazanê xo. Embaz Gelhatî Şehîd Serdar de pê pêro hêzê xo hêrişê dişmenî kerd û sey milîtanê durust û fedayî kerwanê bêmergan de ca girewt.

Embaz Delîl Amed de dadîya xo ra bîyo û netîceya cigêrayîşanê xo de pê felsefeya Rayber Apoyî tewrê gerîlayan bi. Embaz Delîlî gerîlatîye de tim xo aver berd û giranîye daye perwerdeyê xo. Embaz Delîlî cenetê Kurdîstanî Avaşîn de vera dişmenî xeylêk çalakîyan de şer kerd û derbê giranî dayî dişmenî ro. Embaz Delîlî heta guleyê peyênî vera artêşa îşxalkere şer kerd, vera îxanet û teslîmîyetî tewirê xo ra tawîz nêda û bi hawayêkê fedayî şehîd bi.

Ma sere de keyeyanê ercîyayeyan ê milîtananê rayberan ê Avaşînî Ernesto, Gelhat û Delîlî rê pêro şarê welatperwerî yê Kurdîstanî rê serweşîye wazenê. Ma reyna soz danê ke ma do têkoşînê embazanê ma yê şehîdan pê serkewtişî tacîdar bikerê.''