Merkezê Îrtîbatî û Çapemenîye yê HPGyî nasnameyê 4 gerîlayanê ke qezayêkî ra şehîd bîyê eşkera kerdî. Eşkerayîye wina ya:

''Sibata 2022yî de Herêmanê Pawitişî yê Medya de wexto ke komêka embazanê ma, xebata perwerdeyî de bîye teqayîşêk qewimîya. Nê qezayî de embazê ma Sîdar, Mordem, Serbest û Şevger şehîd bîyî. Şehadetê nê embazanê ma yê ke fermandarê fedayî bîyî, ma rê û şarê ma rê vînîbîyayîşêko pîlêr o. Ma do şehadetê nê embazanê xo ra tecrubeyan bigêrê û sozê xo dibare bikerê ke xeyalanê înan bîyarê ca.

Nasnameyê embazanê ma yê şehîdan wina yê:

Embaz Sîdaro ke eslê xo de Efrînî ra yo, Heleb de dadîya xo ra bîyo. Embaz Sîdar 2012 de tewrê têkoşînî bi û wextêk warê Rojawanî de têkoşîn kerd. Dima ey verê xo da koyanê Kurdîstanî. Ey mîyanê Hêzanê Taybetan de sey fermandarêkî ca girewt û kedêka bêhempaye mojnaye. Embaz Sîdar pê kesayetê xo bi mazharê heskerdişê embazanê xo û ey tim xo rê perwerîya bi PKKyî kerde esas. Şehadetê embaz Sîdarî tim ma rê bibo sebebê fedayîtî û milîtanîyê berze.

Embaz Mordem Amed de dadîya xo ra bîyo. Embaz Mordem wextê zanîngehî de hetê dewlete ra 2 serran zîndan de ame esîrkerdene û dima  ke zîndanî ra vejîya vera hêrişanê DAÎŞî yê Şingal û Kobanê 2015 de verê xo da koyan. Ey wextêk Qendîl de têkoşîn kerd û dima zî mîyanê Hêzanê Taybetan de ca girewt. Embaz Mordemî tim xîret kerd ke xo pê perwerde û îdeolojîya partîye aver bero. Embaz Mordem pê hişmendîya xo kerd ke heqê pêro zehmetîyan ra bêro.

Embaz Serbest Cizîra Botanî de dadîya xo ra bîyo.  Embaz Serbestî 2012 de vera hêrişanê dişmenî waşt gerîla bibo la seba ke hema doman bi 2014 de verê xo da koyan. Embaz Serbest waştişê xo ser o 2016 de derbazê herêma Avaşînî bi ke tede şerê giranî qewimîyayêne. Ey Avaşîn de serkêşîya xeylêk çalakîyanê serkewteyan kerde û dima tewrê Hêzanê Taybetan bi. Embaz Serbest bê teredut û qesawetî tewrê şerî bi, tim xeta Zîlane ser de şi û ma rê bi fermandarêko mîsal.

Embaz Şervger şaristanê Minbicî yê Rojawanî de dadîya xo ra bîyo. Embaz Şevgerî dima ke QSDyî Minbic kerd azad bire daye ke tewrê gerîlayan bibo. Embaz Şevgerî giranîye daye ser ke xo pê perwerdeyan aver bero. Wextêkî ra dima zî embaz Şevger sey fermandarêkî tewrê Hêzanê Taybetan bi. Embaz Şevgerî tim xo rê azadîya Rayber Apoyî kerde esas. Embaz Şevgerî şerê tunelan de viraştişê taktîkan ser o xîret kerdêne. Embaz Şevger zerrîya pêro embazanê xo de wayîrê cayêkê ercîyayeyî yo.

Ma sere de keyeyanê ercîyayeyan ê embazanê xo rê pêro şarê welatperwerî yê Kurdîstanî rê serweşîye wazenê. Ma vengê înan danê ke dormeyê erjanê şehîdan de kom bibê û têkoşînî geş bikerê.''