Merkezê Îrtîbatî û Çapemenîye yê HPGyî derheqê şehadetê hîrê gerîlayan de eşkeraye daye.

Eşkerayîya HPGyî wina ya:

''7ê hêzîrane de warê Navsera yê herêma Cûdîyî de mabênê hêzanê ma û îşxalkeran de pêkewtişêk qewqimîya. Nê pêkewtişê giranî de ke xeylêk îşxlakerî ameyî cezakedene, embaza ma Dilzose Cûdî ya ke heta guleyê  xo yê peyênî bi hewayêkê fedayîkî şer kerd bi giranî birîndare bîye û seba ke weş destê dişmenî mekewo bombaya xo serê xo de teqnaye û tewrê kerwanê şehîdan bîye.

Nasnameyê hemraya ma ya şehîde wina yo:

Hemraya ma Dilsoze Cûdî ya ke zerrîya Kurdîstanî Botan de ameya dinya keyeyêko welatperwer de bîya pîl. Seba ke nêzdîbîyayîşê Rayber Apoyî yê cinîyan serê aye de tesîr kerdo xebatanê ciwanîye de aktîf ca girewto  dima ra vera hêrişê qirkerdişî yê dişmenî qerar girewto ke tewrê têkoşînê gerîlayan biba. Perwerdeyan de xeta cinîya azade ser o vinderta ke na xete cuya xo de temsîl bikera. Bado ke xeylêk cayan de pratîk rayra berd verê xo da Botanî.  Hemraya ma Dilsoza ke xeylêk çalakîyan de hersê xo yê vera dişmenî ramojna xo dima rêça xorîye verda û zerrîya embazanê xo de ca girewte.

Ma eşkerayîya xo ya 30ê nîsane de dabi eşnawitene ke 29ê adara 2021î de warê Kela Şehîdanî yê Mêrdînî de pêkewtiş qewimîyayo û tîya embazê ma Agît Timok (Kahraman Sunar) şehîd bîyo. Dima ra ma embazanê ma yê herême safî kerde ke hemrayê ma Kahraman şehîd nêbîyo, weş o. Pêkewtiş de hemrayê ma Agît Bîrhat ( Serdar Saglam) şehîd bîyo. Reyna eynî pêkewtişî de embazê ma Ferhat zî tewrê kerwanê şehîdan bîyo.

Nasnameyê hemrayanê  ma yê ke şehîd bîyî wina yê:

Hemrayê ma Agîto ke keyeyêko kedkar ê Botanî de ameyo dinya pê kulturê welatperwerîye bîyo pîl. Bado ke metropoldan rîyo raşt ê dişmenî dîyo tewrê têkoşînî bîyo. Bi kesayetê serberzî yê Botanî xabetan de aktîf ca girewto û têgêrayîşê azadîye nêzdî ra nas kerdo. Dima ke îdeolojîya Rayber Apoyî nas kerde verê xo dayo sefanê gerîlayan û pratîk de xo cade resnayo û bîyo gerîlayêko serkewte. Herêmanê Pawitişî yê Medya de xeylêk wezîfeyî ardî ca. Gama ke çeteyanê DAÎŞî hêrişê şarê Başûrê Kurdîstanî kerd vazda hewarê şarê Mêxmûr û Kerkukî. Dima ra sey fermandarê gerîlayan verê xo de herra xo Botanî. Hemrayê ma Agît do tim mîyanê qehremananê Botanî de bêro vîrardene û têkoşînê ma rê bibio çimeyê îlhamî.

Hemrayê ma Ferhado ke keyeyêko welatperwer ê Mêrdînî de ameyo dinya bi kulturê welatperwerîye û xoverdayîşî bîyo pîl. Hema domanîya xo de caardişê asîmîlasyonî yê dewleta tirke ferq kerdî û kewto peyê cigêrayîşî. Netîceya cigêrayîşanê xo de felsefeya Rayber Apoyî nas kerda û serranê unîversîte de aktîf tewrê xebatan biyo û dima ra verê xo dayo koyanê azadan. Hemrayê ma Ferhadî gerîlatîye de wezîfeyê muhîmî girewtî xo ser û biserkewtiş ardî ca. Hemrayê ma Ferhat badê  serran sey fermandarêkî verê xo da Vakurê Kurdîstanî. Mêrdîn de vera îşxalkeran xoverdayîşê destankî de ca geno û derbanê pîldan dano dişmenî ro. Hemrayê ma Ferhat semedê embazanê xo yê têkoşînî do tim bibo perpektîfê têkoşînî.

Ma keyeyanê erjîyayeyan ê şehîdanê xo û heme şarê welatperwerî yê Kurdîstanî rê seweşîye wazenê. Ma soz danê ke ma do têkoşînê şehîdan bi serkewtişî tacîdar bikerê.''