Endamê Kongreya Îslamî ya Demokratîke (DÎK) Mala Yusuf Andanî ANFyî rê qisey kerd û pare kerd ke merdimê misilmanî ganî xo sîyasetî ra dûrî megêrê çunke sîyaset bi xo cû ya.

Yusuf Andanî vat: ''Eke bi nîyetê holî sîyaset û Îslam pîya bêrê kerdene hol o labelê eke dîn semedê sîyasetê gemarinî bêro kerdene rewşe vurîyena. Eke sîyaset semedê zulmî bêro kerdene ganî çew ney qebul nêkero. sîyaseto gemarin pê dînî merdiman rê yeno pêşkêşkerdene. Bala xo bidê ser êyê ke nêeşkarî bi qîmî dînî qebul bikerê sereyê tornanê pêxamberî pa kerdî. Înan no semedê dînî nê semedê sîyasetî kerd.

Ewro dîndarî fetwa danê û merdimanê dîndaran kenê hedef. Vanê Şêx Seîd armenî yo. pê fetwayanê înan merdimê ma ameyî qetilkerdene. Ewro zî ma sey 'terorîstî' îlan kenê. Nika nê roportajî rê dima mi rê zî vajê 'Yusuf komunîst o.' La ez vana ma sey qanûnanê huqûqê globalî têbigêrê.''

Andanî bale ante ser ke heta dinya estba mazlûm zî zalim zî do estbê û vat: ''Zalimî ê kes ê ke heq, edalet û huqûqî qebul nêkenê. Mazlûmî êyê ke heqanê xo wazenê. Mîsal ez sey mazlûmêkî qisey kena çunke herinda ziwanê xo kirdkî de tirkî qisey kena. Eke na zalimîye mi rê nêbîyayêne mi bi ziwanê xo qisey kerdêne. Semedo ke ez heqanê xo wazena sey terorîstî îlan bena. Pê îşkenceyî mi rê teda yena kerdene. Rojêke ma zî do heqê xo bigêrê.''