Nêverda cenazaya gerîla Ataşî debikewa Dêrsim

Destûr nêame dayene ke cenazaya gerîlayê TÎKKO/TKP-ML Ataşo ke pêkewtişê Pulur de şehîd bi debikewa Dêrsim.

3 rojî verê cû cenazaya gerîlayê TÎKKO/TKP-ML Hasan Ataşî (Şerzan)o ke şerêkê qezaya Pulurî ya Dêrsimî de şehîd bibi Dezgehê Tibê Edlîyî yê Meletî ra keyeyê ci rê ameye teslîmkerdene.

Cenazaya Ataşî seba ke şora Dêrsim kontrolkerdişê nasname ra dima ameye açarnayene. Seba ke ame astengkerdene cenazaya Ataşî ameye berdene bi Cemxaneyê Mazgêrdî. Dima zî leşkeranê ke rayîrê mabênê Mazgêrd û Lazvanî girewtî, nêverda ke wekîla HDPyî Dilşate Canbaz zî tede hemwelatîyî tewrê merasîmê cenaza bibê.

Qeymeqamê qeza û fermandarê cendirmeyan keyeyê Ataşî rê telefon kerd û vat  têna keye eşkeno tewrê merasîmî bibo. Keye seba ke bieşko cenaza bîyaro merkezê Dêrsimî do têbigêro. Cenazaya Ataşî hema zî Cemxaneyê Mazgêrdî de yena vindartene.