Nêweşxaneyê Dewlete yê Erdîşî yê Wanî de seba ke derman çin o, nêweşê ke seba tedawî şinê, dermanxaneyan ra derman gênê. Nêweşê ke debara ci hol a, eşkenê dermanan bihêrînê la nêweşê xizanî nêeşkenê.

Doktorê servîsê ciewnîyayîşê giranî nêweşan rê vanê ''Nêweşxane de serûm çin o, şorê dermanxaneyan ra bihêrînê, bêrê. Eke şima serûm nêyarê ma nêeşkenê şima tedawî bikerê.''

Beşê Nêweşîyanê Cinîyan û Domanan de zî têna 6 ranzayî est ê û nêweşî mexdûr benê. Coka nêweşî zêdeyêr şina nêweşxaneyanê merkezê Wanî.

Hemsereka Sendîkaya Karkeranê Weşîye (SES) Fîgene Çolakoglu da zanayene ke krîzê ekonomî yê Tirkîya tesîrê warê weşîye zî kerdo û vat: ''Rîyê krîzî ra nêweşxaneyî nêeşkenê derman bigêrê. Nêweşxaneyê Erdîşî de derman nêno peydakerdene, ranza û xebatkarê weşîye kêm ê. coka hem kedkarê weşîye hem zî nêweşî benê mexdûr. Kesê ke polîtîkayanê weşîye virazenê, sûcarê na rewşe yê.''